Ուկրաինական պատերազմից հետո Թուրքիայում ԵՄ-ին և ՆԱՏՕ-ին հանրային աջակցությունը զգալի աճել է

Ռուս-ուկրաինական պատերազմի մեկնարկից ի վեր Թուրքիայում հանրային աջակցությունն արևմտյան բլոկներին, ինչպիսիք են Եվրամիությունը և ՆԱՏՕ-ն, զգալիորեն աճել է: Այս մասին է վկայում Pew Research Center-ի հրապարակած նոր հարցումը, գրում է Middle East Eye-ը։

Հարցումն անցկացվել է այս տարվա հունվարի 29-ից մարտի 11-ն ընկած ժամանակահատվածում ամբողջ երկրում՝ 1049 քաղաքացու հետ հարցազրույցների միջոցով: Պարզվել է, որ թուրքերն այժմ ավելի դրական են վերաբերվում ՆԱՏՕ-ին, որին Թուրքիան տասնամյակներ շարունակ անդամակցում է։ Դաշինքին աջակցությունը 2019 թվականի 25 տոկոսից այս տարվա սկզբին հասել է 42 տոկոսի:

Ինչ վերաբերում է ԵՄ-ին, այս դեպքում նույնպես փոփոխությունը նկատելի է։ Հարցմանը մասնակցած չափահաս թուրքերի 56 տոկոսն ասել է, որ կողմ է ԵՄ-ին Թուրքիայի անդամակցությանը։ Դրան աջակցությունը 2017 թվականին ընդամենը 40 տոկոս էր։

«Թուրքական հասարակությունն ավելի ու ավելի է անհանգստացած Ռուսաստանի ներխուժմամբ Ուկրաինա, և նրանք նայում են դեպի արևմտյան կազմակերպություննեը՝ տարածաշրջանում կայունության համար։ Թուրքիան եղել է ՆԱՏՕ-ի հավատարիմ անդամ Սառը պատերազմի ամբողջ ընթացքում՝ Երկրորդ համաշխարհային պատերազմի ընթացքում իր նեղուցների նկատմամբ Խորհրդային Միության բռնակցման սպառնալիքներից հետո»,- լրատվամիջոցին ասել է անկախ վերլուծաբան Ջերեն Քենարը՝ հավելելով, որ ազդեցություն ունի երկրում չդադարող գնաճը։

Անկարայի հարաբերությունները ՆԱՏՕ-ի հետ սրվել են մի շարք հարցերի, այդ թվում՝ Թուրքիայի կողմից ռուսական արտադրության C-400 ՀՕՊ համակարգերի գնման պատճառով։ Չնայած դրանց գնմանը՝ Թուրքիայի կառավարությունն աջակցել է Ուկրաինային 2022 թվականին Ռուսաստանի ներխուժման սկզբից ի վեր՝ անօդաչու թռչող սարքերի և այլ զինատեսակների վաճառքի միջոցով:

Հարցման արդյունքներով՝ թուրքերի միայն մեկ երրորդն է դրականորեն վերաբերվում ՄԱԿ-ին, և միայն 30 տոկոսը՝ Ռուսաստանին։ 26 տոկոսը դրական է վերաբերվում Չինաստանին, 18 տոկոսը՝ ԱՄՆ-ին։

Թուրքերի 60 տոկոսը չի վստահում համաշխարհային առաջնորդներից ոչ մեկին: Ուկրաինայի նախագահ Վլադիմիր Զելենսկին վստահության ամենաբարձր մակարդակն ունի՝ 31 տոկոս։ Նրան հաջորդում է ՌԴ նախագահ Վլադիմիր Պուտինը՝ 29 տոկոսով։ Հատկանշական է, որ այն մարդիկ, որոնք աջակցում են Թուրքիայի նախագահ Ռեջեփ Թայիփ Էրդողանին, մոտավորապես նույնքան դրական են վերաբերվում թե՛ Ռուսաստանին, թե՛ ՆԱՏՕ-ին։

Էրդողանի ժողովրդականությունը նվազել է 2017 թվականից ի վեր, երբ հեղաշրջման փորձից հետո այն բարձրացավ մինչև 75 տոկոսի: Այս տարի այն նվազել է 32 տոկոսային կետով՝ հասնելով 43 տոկոսի։

Թարգմանությունը՝ Էմմա Չոբանյանի