11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Ադրբեջանի SOCAR-ը բանակցում է Թուրքիայում իր գազաբաշխիչ ցանցի բիզնեսի վաճառքի շուրջ․Bloomberg
Քաղաքականություն
22.11.2024 | 23:06
Ադրբեջանի SOCAR պետական նավթային ընկերությունը բանակցություններ է վարում Թուրքիայի գազաբաշխիչ ցանցի հետ կապված իր բիզնեսի վաճառքի շուրջ։ Այս մասին Bloomberg-ին հայտնել է SOCAR-ի աղբյուրը, գրում են ադրբեջանական լրատվամիջոցները։
SOCAR-ի դուստր ձեռնարկություններից մեկը՝ Socar Turkey Dogalgaz Yatirim AS-ը, պատկանում է տեղական գազի բաշխիչ ցանցերի՝ Bursagaz և Kayserigaz օպերատորներին, որոնք գործում են Թուրքիայի Բուրսա և Կայսերի նահանգներում։
Այս ընկերություններն ընդհանուր առմամբ սպասարկում են 1,9 միլիոն բաժանորդի: Անցյալ տարի նրանք բաժանորդներին վաճառել են 1,7 միլիարդ խորանարդ մետր գազ։ SOCAR-ը այս ընկերությունների բաժնետոմսերը ձեռք է բերել գերմանական EWE AG-ից 2019 թվականին։
Աղբյուրը հայտնել է, որ Socar Turkey Dogalgaz Yatirim AS-ի բաժնետոմսերի վաճառքի շուրջ բանակցությունները սկսվել են վերջերս, սակայն գործարքի մանրամասները չեն նշվում։ Իրավիճակին ծանոթ աղբյուրները ենթադրում են, որ գնորդ գտնելու դեպքում SOCAR-ին վաճառքը կարող է բերել մի քանի հարյուր միլիոն դոլար։
Պոտենցիալ գնորդների թվում են Aksa Dogal Gaz Dagitim AS-ը, Ahlatci Dogal Gaz AS-ը և Palmet Enerji AS-ը, որոնք ուղղակի բանակցություններ են վարում SOCAR-ի թուրքական դուստր ձեռնարկության հետ։ Աղբյուրները, որոնք ցանկացել են անհայտ մնալ, հայտնել են, որ տեղեկությունը գաղտնի է։ Aksa-ի, Ahlatci-ի և Palmet-ի ներկայացուցիչները հրաժարվել են մեկնաբանություններից:
Թուրքիայի SOCAR-ի բնական գազի ստորաբաժանման ղեկավար Ֆուադ Իբրահիմովն այս տարվա մարտին dogalgaz.com.tr-ին տված հարցազրույցում պատմել է Թուրքիայում ընկերության գազաբաշխիչ ցանցի բիզնեսի զարգացման ծրագրերի մասին։ Նա նշել էր, որ Socar Turkey Dogalgaz Yatirim AS-ը սպասարկում է 1,9 միլիոն բաժանորդ Բուրսա և Կայսերի նահանգներում, որոնցից 1,2 միլիոնը միայն Bursagaz-ից են, որը Թուրքիայի գազաբաշխիչ ցանցի չորրորդ խոշոր օպերատորն է։
Իբրահիմովի խոսքով՝ Bursagaz-ը շահագործում է մոտ 7600 կիլոմետրանոց ցանց՝ ընդգրկելով Բուրսայի 11 շրջանները։ 2019 թվականից SOCAR-ը մոտ 170 միլիոն դոլարի ներդրում է կատարել Bursagaz և Kayserigaz ընկերություններում և նախատեսում է ավելացնել ներդրումների ծավալը՝ մինչև տարեվերջ ընդլայնելով այդ ընկերությունների գազաբաշխման ցանցը մինչև 14,700 կիլոմետր։
Հավելենք, որ ադրբեջանական SOCAR-ի ընդհանուր ներդրումները Թուրքիայում կազմում են մոտ 18 մլրդ դոլար։ Ընկերությանը պատկանում է STAR նավթավերամշակման գործարանը, ինչպես նաև երկրի նավթաքիմիական և վերամշակող մի շարք ձեռնարկություններ։
Թարգմանությունը՝ Էմմա Չոբանյանի
