07.11.2026 | 17:30
Ծանրորդ Էմմա Պողոսյանն աշխարհի առաջնությունում 8-րդն է
Թուրքիան Սոմալիում տիեզերակայան կկառուցի
Քաղաքականություն
22.11.2024 | 23:15
Թուրքիան Սոմալիում տիեզերակայան կկառուցի հրթիռների փորձարկումներ և հեռահար արձակումներ իրականացնելու համար։ Այս մասին հայտնում է Թուրքիայի իշխանամերձ Sabah-ը՝վկայակոչելով Թուրքիայի նախագահ Ռեջեփ Թայիփ Էրդողանի խոսքերը, գրում է Turkish Minute-ը։
Հաղորդվում է, որ Էրդողանը Արդարություն և զարգացում կուսակցության (AKP) Կենտրոնական գործադիր կոմիտեի նիստի ժամանակ հայտարարել է զարգացումների մասին՝ այն անվանելով Թուրքիայի տիեզերական հավակնությունների կարևորագույն փուլ։
Սոմալիում օբյեկտի կառուցման որոշումը կապված է հասարակածին նրա մոտ լինելու հետ, մի վայր, որը ձեռնտու է հրթիռների արձակելու համար վառելիքի խնայողության և ավելի լավ բեռնատարողունակության առումով:
Տիեզերակայանի շուրջ պայմանավորվածություն է ձեռք բերվել Թուրքիայի և Սոմալիի միջև կնքված ծովային համաձայնագրի շրջանակներում, որն ազդարարում է երկու երկրների միջև հարաբերությունների խորացումը։
Թուրքիան նախկինում հրթիռային փորձարկումներ է իրականացրել իր Սինոպի փորձարկման վայրում, սակայն սահմանափակ հնարավորությունները հանգեցրել են ավելի մեծ, ավելի մեկուսացված վայր տեղափոխվելուն:
Հավակնոտ նախագծի մասին հայտարարվում է Թուրքիայի շարունակական տնտեսական խնդիրների ֆոնին։ Քննադատները պնդում են, որ տիեզերական ծրագրին հատկացվող միջոցները կարող են ավելի նպատակային ծախսվել ներքին խնդիրների վրա, և կասկածի տակ են դնում նման ծախսատար նախաձեռնությունների առաջնահերթությունը տնտեսական դժվարությունների ժամանակ:
Թարգմանությունը`Էմմա Չոբանյանի
