Ուկրաինան ցանկանում է ՆԱՏՕ-ին անդամության հրավեր ստանալ մինչև Ջո Բայդենի նախագահության ավարտը

ՆԱՏՕ-ում Ուկրաինայի դեսպան Նատալյա Գալիբարենկոն Reuters-ին տված հարցազրույցում ասել է, որ Կիևը խնդրում է դաշինքին միանալու պաշտոնական հրավեր ուղարկել մինչև ԱՄՆ նախագահ Ջո Բայդենի պաշտոնավարման ժամկետի ավարտը, գրում է BBC-ի ռուսական ծառայությունը։

Ջո Բայդենի նախագահության ժամկետն ավարտվում է հունվարի 20-ին։

«Մեր գաղափարն այն է, որ Ուկրաինային այս պահին հրավեր տալը քաղաքական ազդանշան է։ Մենք անկեղծ հավատում ենք, որ դա կարող է լինել ամերիկյան ներկայիս վարչակազմի ժառանգության մի մասը»,- ասել է դեսպանը։

ՆԱՏՕ-ի երկրների ղեկավարները բազմիցս հայտարարել են, որ Ուկրաինան ինչ-որ մի օր կմիանա դաշինքին։ Չի նշվում, սակայն, թե կոնկրետ երբ և ինչ պայմաններում դա տեղի կունենա։ Լրատվամիջոցը նշում է, որ Բայդենի վարչակազմի պաշտոնյան անցյալ շաբաթ լրագրողների հետ զրույցում անանունության պայմանով հաստատել էր, որ այս դիրքորոշումը չի փոխվել։

ՆԱՏՕ-ին Ուկրաինայի անդամակցությունից հրաժարվելը նախապայմաններից մեկն է, որն ամռանն առաջադրել էր ՌԴ նախագահ Վլադիմիր Պուտինը խաղաղության բանակցությունների մեկնարկի համար։ Ռուսաստանը նաև ԱՄՆ-ից և ՆԱՏՕ-ից պահանջել է հրաժարվել հետխորհրդային երկրներում ընդլայնումից՝ այդ համատեքստում մատնանշելով Ուկրաինան և Վրաստանը։

«Եթե մենք ասենք, որ հրավերը կա, ՌԴ-ի համար դա կլինի վերջնական դատավճիռ, այսպես որ՝ վերջ, այլևս չեք կարող ավելացնել խաղադրույքները այդ թեման  բարձրացնելով»,- ասել է Ուկրաինայի դեսպանը։

Թարգմանությունը՝ Էմմա Չոբանյանի