Քաղաքականություն
09.10.2024 | 18:10
Թուրքիայի խորհրդարանը նախօրեին փակ նիստ է գումարել՝ քննարկելու Գազայում Իսրայելի շարունակվող ռազմական գործողություններն այն ֆոնին, որ թուրքական ղեկավարությունն Իսրայելը որակում է որպես «ազգային անվտանգության սպառնալիք»: Դռնփակ հանդիպմանը մասնակցել են նաև Թուրքիայի արտաքին գործերի ու պաշտպանության նախարարներ Հաքան Ֆիդանն ու Յաշար Գյուլերը։
Ըստ տեղական լրատվամիջոցների՝ խորհրդարանի նախագահ Նուման Քուրթուլմուշը քվեարկության է դրել այս հարցով հանդիպում անցկացնելու առաջարկը, որը խորհրդարանը համարում է «ազգային անվտանգության խնդիր»։
«Մենք պետք է առաջ շարժվենք միասնաբար և վճռական քայլեր ձեռնարկենք տարածաշրջանում Իսրայելի ծավալապաշտական քաղաքականության դեմ, որը մենք դիտարկում ենք որպես ազգային անվտանգության խնդիր»,- ասել է Քուրթուլմուշը օրենսդիրներին։
Նրա խոսքով՝ Թուրքիան ամեն ինչ կանի տարածաշրջանում շարունակվող հակամարտությունը դադարեցնելու համար, և որ Իսրայելի գործողությունները Գազայում ապակայունացնում են Մերձավոր Արևելքը և պոտենցիալ սպառնում են Թուրքիային։
Հաղորդվում է նաև, որ փակ նիստում քննարկվածը որոշվել է որպես պետական գաղտնիք պահել 10 տարի։
Հիշեցնենք՝ Թուրքիայի նախագահ Ռեջեփ Թայիփ Էրդողանն օրերս հայտարարել էր, որ Իսրայելի ղեկավարությունը, Պաղեստինից և Լիբանանից հետո, հայացքն ուղղելու է դեպի Թուրքիայի հողերը։
Թուրքիայի գլխավոր ընդդիմադիր Ժողովրդահանրապետական կուսակցության նախագահ Օզգյուր Օզելն էլ, անդրադառնալով Էրդողանի՝ Իսրայելի հնարավոր հարձակման վերաբերյալ հայտարարությանը, պնդել է, որ խորհրդարանում պետք է քննարկում կազմակերպվի այդ թեմայով։
Թարգմանությունը՝ Էմմա Չոբանյանի
