Նիդերլանդները հաստատել է, որ Ուկրաինան Ամստերդամից ստացել է առաջին F-16 կործանիչները

Նիդերլանդների պաշտպանության նախարար Ռուբեն Բրեկելմանսը պաշտոնապես հաստատել է, որ Կիևը ստացել է առաջին F-16 կործանիչները, որոնք երկիրը պարտավորվել էր փոխանցել Ուկրաինայի զինված ուժերին, գրում է Current time-ը։

«Կարող եմ պաշտոնապես հայտարարել, որ առաջին հոլանդական F-16 կործանիչները մատակարարվել են Ուկրաինային։ Դա բացարձակապես անհրաժեշտ է։ Խարկովում ես տեսել եմ ռուսական ավիահարվածներից վնասները և լսել հաճախակի օդային հարվածների տագնապի ազդանշաններ: Մնացած ինքնաթիռները կժամանեն մոտակա ամիսներին»,- Ուկրաինա կատարած այցից հետո գրել է նա X-ում։

Ամստերդամը, ընդհանուր առմամբ, Կիևին պետք է մատակարարի 24 ինքնաթիռ։ Բրեկելմանսը չի հայտնել, թե Ուկրաինան արդեն քանիսն ունի, սակայն ասել է, որ ավելի շատ F-16-ներ երկիր կժամանեն «առաջիկա ամիսներին՝ մինչև հաջորդ տարվա սկիզբը»։

Խարկով ու Կիև այցի ժամանակ նա նաև հայտարարել էր Ուկրաինայի հետ անօդաչու սարքերի համատեղ մշակման և արտադրության մասին, որի համար պատրաստվում են հատկացնել 400 մլն եվրո։

Բրեկելմանսը նշել էր, որ Կիևը հակաօդային պաշտպանության համակարգերի լրացուցիչ մատակարարման մասին  է խնդրում, մասնավորապես, կարևոր են Patriot զենիթահրթիռային համակարգերը։ Նիդերլանդներն Ուկրաինային տրամադրել է հակաօդային պաշտպանության այս համակարգերի բաղադրիչները և նախատեսում է ավելի շատ մատակարարել:

Ուկրաինայի նախագահ Վլադիմիր Զելենսկին օգոստոսի 4-ին հաստատել էր, որ առաջին F-16 ինքնաթիռներն արդեն գտնվում են երկրում և ցուցադրել դրանք գաղտնի օդանավակայանում։ Դրանից  առաջ արևմտյան ԶԼՄ-ները, հղում անելով աղբյուրներին, հայտնել էին, որ Նիդերլանդներից Ուկրաինա է ժամանել վեց կործանիչ, մի քանիսն էլ սպասվում են Դանիայից։

F-16 կործանիչներն Ուկրաինային տրամադրում են Նիդերլանդները, Դանիան, Բելգիան և Նորվեգիան։

Թարգմանությունը ՝ Էմմա Չոբանյանի