25.06.2026 | 16:25
Երկրաշարժի կեղծ կանխատեսում․ X-ում տարածվող ապատեղեկատվության թիրախը Կոտայքում կառուցվող AI գործարանն է
Իսրայելն առաջիկա օրերին կարող է հարվածներ հասցնել իրանական օբյեկտներին. Axios
Քաղաքականություն
02.10.2024 | 10:37
Առաջիկա օրերին Թել Ավիվը կարող է հարվածներ հասցնել իրանական նավթային և այլ ռազմավարական օբյեկտներին՝ ի պատասխան հրթիռային հարձակումների, հայտնում է Axios-ը՝ վկայակոչելով իսրայելական պաշտոնյաներին։ Իսրայելը մի քանի օրվա ընթացքում «զգալի պատասխան հարված» կհասցնի հրթիռային հարձակմանը, որը կարող է թիրախավորել նավթի արդյունահանման օբյեկտները և ռազմավարական այլ վայրեր: Կդիտարկվեն բոլոր տարբերակները, այդ թվում՝ հարվածները Իրանի միջուկային օբյեկտներին, գրում է պարբերականը։
Բացի այդ, Իսրայելը կարող է պատասխանել հարձակմանը` սպանելով կոնկրետ անձանց և ոչնչացնելով Իրանի հակաօդային պաշտպանության համակարգերը: Ըստ Axios-ի՝ կոնկրետ պատասխան քայլերի վերաբերյալ որոշում դեռ չի կայացվել, քանի որ Իսրայելը ցանկանում է դրանք համաձայնեցնել ԱՄՆ-ի հետ։
Միևնույն ժամանակ, ըստ ամերիկացի պաշտոնյայի, Վաշինգտոնը հասկացրել է Իսրայելին, որ աջակցում է Իրանի հրթիռակոծությանը պատասխանելու իր մտադրությանը, սակայն կարծում է, որ պատասխանը պետք է լինի հավասարակշռված։
Նախօրեին Իսրայելի պաշտպանության բանակի մամուլի ծառայությունը հայտնել էր, որ Իրանը մոտ 180 հրթիռ է արձակել հրեական պետության ուղղությամբ, որոնցից շատերը որսացել են։ Այդուհանդերձ, սոցցանցերում տեսանյութերում երևում է, թե ինչպես են հրթիռներն ընկնում երկրի տարբեր հատվածներում։
Իսրայելի տարածքի վրա հարձակման հետևանքով մեկ մարդ է զոհվել, նա անօրինական ներգաղթյալ է Գազայի հատվածից։ Շտապօգնության ծառայությունը հայտնել է մի քանի անձանց բեկորային վնասվածքներ ստանալու մասին։
Թարգմանությունը՝ Տաթև Ֆռանգյանի
