Իսրայելը ցամաքային գործողություն է սկսել Լիբանանի հարավում գտնվող «Հըզբոլլահ»-ի թիրախների դեմ

Իսրայելական բանակը հայտարարել է, որ երկուշաբթի «սահմանափակ գործողություն» է սկսել Լիբանանի հարավում՝ թիրախավորելով լիբանանյան «Հըզբոլլահ» խմբավորման թիրախները սահմանային շրջաններում, փոխանցում է BBC-ի ռուսական ծառայությունը:

«Մի քանի ժամ առաջ Իսրայելի պաշտպանության բանակը սկսել է սահմանափակ, տեղայնացված և նպատակաուղղված ցամաքային հարձակումներ՝ հիմնվելով հարավային Լիբանանում գտնվող «Հըզբոլլահ»-ի ահաբեկչական օբյեկտների և ենթակառուցվածքների դեմ ճշգրիտ հետախուզական տեղեկատվության վրա: Այս թիրախները գտնվում են սահմանամերձ գյուղերում և ուղղակի վտանգ են ներկայացնում Իսրայելի հյուսիսում գտնվող իսրայելական համայնքների համար»,- ասվում է Իսրայելի պաշտպանության բանակի հայտարարության մեջ:

Զինվորականները հավելել են, որ իսրայելական օդուժը և հրետանին աջակցում են ցամաքային ուժերին՝ ճշգրիտ հարվածներ հասցնելով տարածքում գտնվող ռազմական թիրախներին։

Երկուշաբթի տեղեկություններ ստացվեցին, որ Իսրայելը պատրաստվում է ցամաքային գործողության Լիբանանի հետ սահմանին՝ ապահովելու երկրի հյուսիսային շրջանների անվտանգությունը, որոնք գտնվում են «Հըզբոլլահ»-ի զինյալների մշտական կրակի տակ։

Երկուշաբթի երեկոյան Իսրայելում կայացել է ռազմական կաբինետի նիստը, որի ժամանակ, ըստ տեղական լրատվամիջոցների, հավանության է արժանացել «Հըզբոլլահ»-ի դեմ գործողության հաջորդ փուլը։

ԱՄՆ Պետքարտուղարության խոսնակ Մեթյու Միլլերը ճեպազրույցում ասել է, որ Իսրայելի իշխանությունները Վաշինգտոնին տեղեկացրել են Լիբանանում «մի շարք գործողությունների», այդ թվում՝ ցամաքային գործողությունների մասին։

Թարգմանությունը՝ Տաթև Ֆռանգյանի