Ինչո՞ւ են Հայաստանում թմրանյութերը դարձել մատչելի և հասանելի․ ինչպես կանխել ահագնացող վտանգը․ Քննարկում․ ՏԵՍԱՆՅՈՒԹ

Ամբողջ աշխարհում, նաև՝ Հայաստանում ահագնացել են թմրանյութերի ապօրինի տարածման և օգտագործման տեմպերը։ Աշխարհում այսօր ավելի քան 296 միլիոն մարդ թմրանյութ է գործածում: Նրանցից 13,5 միլիոնը 15-16 տարեկան դեռահասներ են: Ի՞նչպիսին է վիճակագրությունը Հայաստանում․ ըստ ՆԳՆ-ի՝ 2023 թվականին թմրամիջոցների ապօրինի շրջանառության համար պատասխանատվության է ենթարկվել 10 անչափահաս, 2024 թվականի առաջին եռամսյակում՝ 5 անչափահաս:

Թեև Հայաստանի վարչապետը և բարձր իշխանավորներն արձանագրում են, որ թմրանյութերի ապօրինի շրջանառությունը և դրա ծավալների մեծացումը ազգային անվտանգության խնդիր է, դետալային ուսումնասիրություն արվել է 22 տարի առաջ։ Հենց իշխանական պատգամավորներն են հրապարակային նշում, որ չգիտեն՝ պետական որ գերատեսչությունից պահանջել պայքարի քաղաքականությունը։

Այսինքն, չկա բազային վերլուծություն, որն այսօրվա պատկերը կարտացոլի, և խնդրի խորքայնությունը և լրջությունը վեր կհանվի։ 2023-ից էլ սկսվել է պայքարի ռազմավարություն մշակվել, աշխատում է միջգերատեսչական խումբ, սակայն ոչ ոք չգիտի՝ երբ փաստաթուղթը պատրաստ կլինի։ Ի՞նչ խնդիրներ են առկա թմրանյութերի ապօրինի շրջանառության դեմ պայքարում Հայաստանում։

Այս խնդիրը բարձրաձայնել է Factor TV-ն «Թակարդ N 420. երիտասարդները՝ թմրանյութի ճիրաններում» ֆիլմում։

Մենք նաև քննարկում ենք հրավիրել այս թեմայով, որին մասնակցում են Լենա Նանուշյանը՝ Առողջապահության փոխնախարար, Դավիթ Ամիրյանը՝ սոցիալական հոգեբան, Ժենյա Մալյանը՝ «Իրական աշխարհ, իրական մարդիկ» ՀԿ ներկայացուցիչ։

Քննարկումն ամբողջությամբ՝ տեսանյութում։