Կրակոցներ Թրամփի գոլֆի ակումբի մոտ. ՀԴԲ-ն հետաքննում է նախկին նախագահի դեմ ենթադրյալ մահափորձը

Կրակոցներ են հնչել գոլֆի ակումբի մոտ, որտեղ ԱՄՆ նախագահի հանրապետական ​​թեկնածու Դոնալդ Թրամփը գոլֆ էր խաղում։ Թրամփը կրակոցից մի քանի հարյուր մետր հեռավորության վրա է եղել, սակայն ՀԴԲ-ն հայտարարել է, որ միջադեպը նման է մահափորձի, փոխանցում է BBC-ի ռուսական ծառայությունը:

«Նախագահ Թրամփն ապահով է», – ասել է նրա նախընտրական շտաբի հաղորդակցության հարցերով տնօրեն Սթիվեն Չունգը: Դեպքից չորս ժամ անց հրավիրված մամուլի ասուլիսում ՀԴԲ-ի, Գաղտնի ծառայությունների և տեղի ոստիկանության ներկայացուցիչները հայտնել են, որ «Թրամփ» գոլֆի ակումբի մոտից մի տղամարդ է բերման ենթարկվել, որը փորձել է փախչել մեքենայով, իսկ գոլֆի դաշտի մոտ գտնվող թփերում ինքնաձիգ է հայտնաբերվել։

Նախագահներին և նախկին նախագահներին պաշտպանող Գաղտնի ծառայության ներկայացուցչի խոսքով՝ իրենց աշխատակիցը նկատել է թփերի միջից դուրս ցցված ինքնաձիգը և իր գործընկերների հետ անմիջապես կրակ է բացել։ Այնուհետև ականատեսը տեսել է, թե ինչպես է տղամարդը թփերի միջից վազում դեպի սև «Nissan» մակնիշի մեքենան, նստում ու քշում։

Ոստիկանները տղամարդուն բերման են ենթարկել հարևան շրջանների մեկի մայրուղուց: Թփերի մեջ հայտնաբերված ինքնաձիգը AK-47 տիպի է՝ օպտիկական դիտակետով, հայտնաբերվել է նաև երկու ուսապարկ և GoPro տեսախցիկ։ Ամերիկյան մի քանի առաջատար հեռուստատեսալիքներ և թերթեր, հղում անելով իրավապահ մարմինների անանուն պաշտոնյաներին, հայտնում են, որ ձերբակալվածի անունը Ռայան Ուեսլի Ռութ է, նա 58 տարեկան է, Հավայան կղզիների բնակիչ։ Պաշտոնական աղբյուրը ձերբակալվածի անունը դեռ չեն հրապարակում։