25.02.2026 | 10:18
NYMEX․ Ոսկու գինը նվազել է 0.94%-ով և կազմել 5155.80 դոլար
ՌԴ տարածքում Միքայել Հարությունյանի նկատմամբ հայտարարված հետախուզումը չեղարկելու մասին գրությունն ուղարկվել է ՀՀ ոստիկանությանը
Քաղաքականություն
07.09.2018 | 12:53
Ինչպես արդեն տեղեկացրել ենք, Ռուսաստանի Դաշնության իշխանություններն իրենց տարածքում չեղարկել են ՀՀ պաշտպանության նախկին նախարար Միքայել Հարությունյանի նկատմամբ հայտարարված միջպետական հետախուզումը․ այս մասին հայտնել է Ինտերֆաքս գործակալությունը։
Factor.am-ի հետ զրույցում Գլխավոր դատախազության հանրային կապերի բաժնի պետ Արևիկ Խաչատրյանը նշեց, որ Դատախազությունը Միքայել Հարությունյանին արտահանձնելու միջնորդություն դեռևս չի ներկայացրել, և ինչպես ավելի վաղ հայտարարեվել է, ՀՀ գլխավոր դատախազությունը դեռևս տվյալներ չունի նաև ՌԴ-ում կամ որևէ այլ տեղ Միքայել Հարությունյանին հայտնաբերելու մասին:
Ոստիկանության լրատվության հետ կապերի բաժնից էլ Factor.am-ին հայտնեցին, որ Միքայել Հարությունյանի վերաբերյալ ՀՀ Ոստիկանությունը ՌԴ-ից գրություն է ստացել, ըստ որի․
«Ըստ այդ գրության՝ ՌԴ-ն իր տարածքում չեղարկել է «Մարտի 1-ի» գործով մեղադրյալ Միքայել Հարությունյանի նկատմամբ հայտարարված հետախուզումը։ Իսկ ինչ վերաբերում է, առհասարակ, հետախուզվողին հայտնաբերելու ուղղությամբ ոստիկանության կողմից իրականացվող քայլերին, ապա տարվող աշխատանքները համարվում են գաղտնի և հրապարակման ենթակա չեն»։
Հիշեցնենք, որ 2008թ. Երևանում «Մարտի 1-ի» դեպքերի համար մեղադրվող Միքայել Հարությունյանի վերաբերյալ նյութերի ուսումնասիրությունից հետո որոշվել է ՌԴ տարածքում չեղարկել նրա նկատմամբ հետախուզումը։
ՌԴ տարածքում, այս որոշմամբ, Միքայել Հարությունյանին ոչինչ չի սպառնում, իսկ եթե վերջինս լքի ՌԴ-ի տարածքը, հնարավոր է նրան ձերբակալեն և արտահանձնեն ՀՀ-ին։
Աղավնի Սուքիասյան
