11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
ԵՄ-ն դատապարտում է ՌԴ-ի ռազմական ներկայությունը վրացական տարածքներում. Բորելի հայտարարությունը
Քաղաքականություն
07.08.2024 | 17:33
ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը հայտարարություն է տարածել օգոստոսյան պատերազմի 16-րդ տարելիցի կապակցությամբ։
Դրանում նշվում է, որ Եվրամիության հանձնառությունը Վրաստանում հակամարտությունների խաղաղ կարգավորմանը մնում է ամուր:
«Մենք կրկին դատապարտում ենք Ռուսաստանի շարունակական ռազմական ներկայությունը Աբխազիայի և Հարավային Օսիայի օկուպացված անջատողական շրջաններում, ինչը միջազգային իրավունքի և 2008 թվականի օգոստոսի 12-ի վեց կետից բաղկացած համաձայնագրով Ռուսաստանի պարտավորությունների խախտում է։ Վրաստանի՝ հակամարտություններով լի շրջաններում շարունակում են խախտվել մարդու իրավունքները, ներառյալ «սահմանային քաղաքականության» իրականացումը, անցակետերի փակումը և ռուս զինվորականների կողմից անօրինական ձերբակալությունները: Պետք է վերացնել ազատ տեղաշարժի սահմանափակումները, պետք է հետաքննվեն մարդու իրավունքների խախտումները և ապահովվի արդարադատություն բոլոր տուժածների համար»,- ասված է Բորելի հայտարարության մեջ։
Դրանում նաև նշվում է, որ ԵՄ-ն լիովին հավատարիմ է հակամարտության խաղաղ կարգավորմանը, ներառյալ՝ Եվրամիության մասնակցությունը որպես Ժնևի միջազգային բանակցությունների (GID) համանախագահ, Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցչի աշխատանքը, ինչպես նաև Վրաստանի տարածքում ԵՄ դիտորդական առաքելության մշտական ներկայությունը:
