07.10.2026 | 22:33
Երևանի և 9 մարզի մի շարք հասցեներում էլեկտրաէներգիայի անջատումներ կլինեն
Անկարգություններ Մեծ Բրիտանիայում. մի քանի տասնյակ վիրավորներ կան. The Indipendent
Քաղաքականություն
31.07.2024 | 14:19
Բրիտանական Սաութպորտ քաղաքում աջ ծայրահեղականների կողմից կազմակերպված անկարգությունների ժամանակ տուժել է 39 ոստիկան։ Նրանցից 27-ը գտնվում է հիվանդանոցում, հայտնում է The Indipendent-ը։
Ըստ իրավապահների տվյալների՝ ոստիկանները ստացել են կոտրվածքներ, ուղեղի ցնցում, այլ վնասվածքներ։ Անկարգությունների հետ կապված ոստիկանությունը մեկ օրով ընդլայնված լիազորություններ է ստացել՝ կասկածյալներին խուզարկելու և ձերբակալելու համար։
Անկարգությունները սկսվել են պարի ստուդիայի վրա դանակով զինված հարձակումից մեկ օր անց, որի արդյունքում սպանվել է 3 երեխա։ Ցուցարարները քարեր են նետել տեղի մզկիթի ու ոստիկանների ուղղությամբ, մեքենաներ ու աղբամաններ այրել։
Ոստիկանության տվյալներով՝ անկարգությունների հիմնական մասնակիցները աջ ծայրահեղական իսլամատյաց «Անգլիայի պաշտպանության լիգա» խմբավորման անդամներ են:
CNN-ի փոխանցմամբ՝ Մեծ Բրիտանիայի վարչապետ Քիր Սթարմերը հայտարարել է, որ անկարգությունների մասնակիցները «բռնությամբ և ավազակությամբ առևանգել են» հարձակման հետևանքով զոհվածների և վիրավորների համար կազմակերպված խաղաղ հավաքը և «վիրավորել վշտի մեջ գտնվող համայնքին»:
Նշենք, որ «Hart Space Studious» մանկական պարային ստուդիայի վրա դանակով հարձակման հետևանքով, երեք զոհերից բացի, ևս 8 երեխա դանակահարվել է, նրանցից 5-ի վիճակը ծանր է։ Ծանր վնասվածքներով հիվանդանոցում են նաև երկու մեծահասակներ։
Հարձակումն իրականացնելու կասկածանքով ձերբակալվել է հարևան Բենքս քաղաքում բնակվող 17-ամյա մի պատանի։ Նրա շարժառիթները պարզվում են։ Ոստիկանությունն այս պահին հարձակումը չի որակում որպես ահաբեկչություն: Իրավապահներն ընդգծել են, որ կասկածյալը ծնվել է Մեծ Բրիտանիայում։
