ՌԴ-ն դեմարշ հայտարարեց ՀՀ-ին, թե ռուսներին Զվարթնոցում խտրական են վերաբերում․ ռևանշ է նախապատրաստում. Արմեն Հովհաննիսյան․ՏԵՍԱՆՅՈՒԹ

Օգոստոսի 1-ին, ըստ Հայաստանի իշխանությունների, ռուս սահմանապահները դուրս են գալու Երևանի «Զվարթնոց» օդանավակայանից, և սահմանային հսկողությունն իրականացելու է ՀՀ Սահմանապահ ծառայությունը։ Այդ իրադարձությանն ընդառաջ՝ Ռուսաստանի նախագահին կից Քաղաքացիական հասարակության զարգացման և մարդու իրավունքների (СПЧ) խորհրդի ղեկավար Վալերի Ֆադեևը դիմել է Մոսկվայում Հայաստանի դեսպան Վաղարշակ Հարությունյանին՝ բողոքելով Երևանի «Զվարթնոց» օդանավակայանում ՌԴ քաղաքացիների հանդեպ ցուցաբերված «խտրական» վերաբերմունքից։ «Ուղևորները հաղորդում են օդանավակայանի անվտանգության ծառայության աշխատակիցների կողմից ազգային պատկանելիության համար բազմաթիվ վիրավորանքների մասին», -գրել է նա։ Հաղորդվում է, որ խորհուրդը Ռուսաստանի քաղաքացիներից դիմումներ է ստացել, որտեղ նրանք բողոքում են, թե FlyOne ավիաընկերության ներկայացուցիչների և օդանավակայանի աշխատակիցների կողմից խախտվել են իրենց իրավունքները։

Քաղաքական վերլուծաբան Արմեն Հովհաննիսյանը սա Ռուսաստանի կողմից Հայաստանի դեմ դեմարշ է որակում․ «Այս դեմարշով ուզում են ցույց տալ, որ ռուսների ներկայությունը օդանավակայանում, երբ ստուգում են մարդկանց, նաև պայմանավորված է նրանով, որ ռուսներն իրենց պաշտպանված զգան։ Արդեն երկար ժամանակ այնպես են կազմակերպում, որ ռուսները մոտենում են այն պատուհաններին, որտեղ ռուսներ են նստած, իսկ մյուսներին ուղարկում են այլ պատուհաններ։ Եթե վաղը Բելգիան հայտարարի, թե, իբր, խտրականություն կա բելգիացիների նկատմամբ, մի պատուհան էլ նրա՞նց համար է պետք նախատեսել»։

Արմեն Հովհաննիսյանը չի կարծում, թե փորձ է արվում կանխել ռուսներին օդանավակայանից հեռացնելու պրոցեսը, սակայն հատուկ միտում տեսնում է․ «Փորձ է արվում ամեն ինչ դնել բացասական հետքի վրա, բացասական ֆոն լինի՝ ռևանշի սպասումով։ Այսինքն՝ իրենք նախապատրաստում են վաղվա օրը։ Այսօրվա օրը այնքան է առաջ անցել, որ ՌԴ-ն չի կարող որևէ բան անել, բայց հետք են թողնում»,- նշեց քաղաքական վերլուծաբանը։

Հարցազրույցն ամբողջությամբ՝ տեսանյութում։

Ռոբերտ Անանյան