09.08.2026 | 11:18
Ուկրաինան հարվածներ է հասցրել Բելգորոդին․ տուժել է 13 մարդ
Թուրքիայի ոստիկանության հայտարարությունը՝ Հայաստանում ձերբակալված թուրքի մասին
Քաղաքականություն
31.08.2018 | 12:25
Թուրքիայի ոստիկանությունը գրավոր հայտարարություն է տարածել Հայաստանի Հանրապետության տարածքում ձերբակալված ազգությամբ թուրք Քևին (Քեմալ) Օքսուզի վերաբերյալ, ով հետախուզվում էր ԱՄՆ-ի կողմից. փոխանցում է ermenihaber-ը:
Նախօրեին ՀՀ ոստիկանության կազմակերպված հանցավորության դեմ պայքարի գլխավոր վարչության ծառայողները, համագործակցելով Հայաստանում Ինտերպոլի ազգային կենտրոնական բյուրոյի ծառայողների հետ, Երևանում հայտնաբերեցին ԱՄՆ-ի իրավապահների կողմից հետախուզվող, ազգությամբ թուրք Քևին (Քեմալ) Օքսուզին։
Թուրքիայի ոստիկանության հայտարարության մեջ ասված է, որ Հայաստանում ձերբակալված Քևին Օքսուզն իհարկե առնչություն ունի Թուրքիայում ահաբեկչական համարվող գյուլենական շարժման հետ, սակայն նրա և գյուլենական համայնքի հայտնի ներկայացուցիչ, փախուստի մեջ գտնվող Ադիլ Օքսուզի միջև որևէ ազգակցական կապ չկա։
«Քեմալ Օքսուզն այս պահին Թուրքիայի Գիրեսունի և Անկարայի դատարանների որոշմամբ գտնվում է հետախուզման մեջ։ Նա մեղադրվում է «Ֆեթուլլահական ահաբեկչական կազմակերպության» անդամ լինելու մեջ։ Նրա նկատմամբ եղել է երկրից դուրս գալու արգելք։ ԱՄՆ-ի Ինտերպոլի աշխատակիցներից ստացված պատասխանում ասվում է, որ տվյալ անձն ԱՄՆ-ի քաղաքացի լինելու պատճառով չի արտաքսվելու կամ արտահանձնվելու։ Ձերբակալվածը խարդախության մեղադրանքով ԱՄՆ-ի կողմից օգոստոսի 23-ից հետախուզման մեջ էր գտնվում։ Նա ընդգրկված էր «կարմիր ցուցակում»։ Հիմնվելով ԱՄՆ-ի՝ տվյալ անձին ձերբակալելու պահանջի վրա, նրա ձերբակալման մասին տեղեկություն ստանալու համար դիմել ենք Հայաստանի Ինտերպոլի բյուրո։ Մենք հետևում ենք իրադարձությունների ընթացքին»։
Հայտարարությունում ասվում է, որ Քևին Օքսուզը հաշվառված է եղել Թուրքիայի Գիրեսուն նահանգի Էսփիյե քաղաքում։
