Այս պահի դրությամբ բազմաթիվ մահացած քաղաքացիներ ենք հայտնաբերել. ոստիկանապետը մաքուր ընտրացուցակների մասին. ՏԵՍԱՆՅՈՒԹ

Հայաստանի ոստիկանապետ Վալերի Օսիպյանն իր աշխատասենյակում ունի Հայաստանի ընտրողների իրական թվաքանակի տվյալները: Ինքն, իհարկե, չի հիշում, թե քանիսն են նրանք։ «Ունենք արդեն իսկ բազմաթիվ հայտնաբերած այս պահի դրությամբ մահացած քաղաքացիներ, որոնք գրանցված են այդ հասցեներում և մոտ 400 հազար անձ Երևան քաղաքում արդեն ստուգվել է»,- ասում է ոստիկանապետը։

Նա վստահեցնում է, որ Երևանի ավագանու ընտրություններին մենք կունենանք ամբողջությամբ ճշգրիտ ընտրական ցուցակներ, սակայն բաներ կան, որ ինքը չի կարող բացառել․ «Հետո հեռու տնից տեղից՝ մարդիկ էլի մահանում են»։

Պարոն Օսիպյանն ամենայն պատասխանատվությամբ է հայտարարում, որ Ոստիկանությունը որևէ կերպ չի ազդելու ընտրությունների արդյունքների վրա, հիմա հասարակությունը գործ ունի բոլորովին այլ Ոստիկանության հետ, որտեղ նույնիսկ կոռուպցիան է բացառված։ «Մենք աշխատակիցներ ունենք, որոնք զեկուցագիր են գրել, ես ողջունում եմ նման աշխատողներին, մի քանիսը կային ասել են՝ մենք մեր վրա վստահ չենք, կարմիր գիծ է քաշվել, ասել եք՝ ոչ կոռուպցիային, արդեն խասիաթ է ձեռք բերվել, իմ գիտակցությունը չհամընկնի, լավ է ես դուրս գամ համակարգից, չդատապարտվեմ»,- հպարտությամբ նշում է Վալերի Օսիպյանը։

Սակայն ոստիկանապետը չի ասի, թե ցածր աշխատավարձ ստացող ոստիկանները նոր իրավիճակում միանգամից դարձել են հրեշտակներ։ «Չեմ բացառում, որ մենք այստեղ ձեզ հետ հանդիպում ենք ունենում, ինչ-որ ոստիկան ինձ անհասկանալի պայմաններում փորձում է ինչ-որ բան անել։ Մեկ կհաջողվի, երկու կհաջողվի, երրորդին ինքը կդատապարտվի»,- զգուշացնում է ոստիկանապետը։

Նա գերազանց է հասկանում մեր տնտեսության վիճակը, որը դեռևս թույլ չի տալիս բարձրացնել ոստիկանների աշխատավարձը։ Միաժամանակ, ճիշտ չեն այն տեղեկությունները, որ հեղափոխությունից հետո ոստիկանները համատարած լքում են շարքերը։ «Չեմ կարծում, որ Ոստիկանության աշխատակիցները չլինելով կոռուպցիոն դրսևորումների մեջ ընդգրկված, լինելով ներկայիս այս աշխատավարձի պայմաններում՝ պիտի լքեն մեր շարքերը»,- նկատում է պարոն Օսիպյանը։

Իր պաշտոնավարման 100 օրվան նվիրված այսօրվա ասուլիսում ոստիկանապետին ուղղված հարցերի մի մասը վերաբերվում էր երկու տարի առաջ ՊՊԾ գնդում նրա պատանդառությանը և «Սասնա ծռերի» տղաների արարքների հանդեպ նրա վերաբերմունքին․ «Միանշանակ ես եղել եմ պատանդի վիճակում։ Իսկ հերոսներ են, թե՝ չէ, կգնահատի դատարանը, կգնահատի պատմությունը, կգնահատի հայ ժողովուրդը»։

Այսօր պարոն ոստիկանապետը տեղեկություններ հաղորդեց նաև Սերժ Սարգսյանի ավագ եղբոր՝ Ալեքսանդր Սարգսյանի՝ Ինտերպոլով հետախուզման մեջ գտնվող որդուն գտնելու հետ կապված աշխատանքների մասին․ «Ոնց որ թե մեր տեսադաշտում շուտով կլինի»։

Այդ իմաստով փոքր-ինչ բարդ է վիճակը մեկ այլ հետախուզվող՝ պաշտպանության նախկին նախարար Միքայել Հարությունյանի հետ կապված, որի գտնվելու վայրը հայտնի է Վալերի Օսիպյանին՝ հետախուզվողը Ռուսաստանի Դաշնությունում է․ «Առայժմ հետախուզում է հայտարարված միջպետական, դեռ Ինտերպոլի հետախուզում չէ»։

Ոստիկանապետն այսօր չմեկնաբանեց պաշտպանության նախկին փոխնախարար Մանվել Գրիգորյանի երեկ հրապարակված լուսանկարի էթիկական նպատակահարմարության մասին հարցը։ Ի դեպ, պարոն Օսիպյանն անդրադարձավ նաև Ոստիկանությունում նախորդ բոլոր տարիներին իր կատարած աշխատանքներին։ Ինքն իրեն որակեց որպես բարեխիղճ գնդապետ։

«Անգամ այն քաղաքացիները, որոնք ասում են՝ գնդապետ Օսիպյանը մեր նկատմամբ եղել է կոպիտ կամ չգիտեմ ինչ, չկա որևէ մեկը որ ասի, որ ես՝ այո, եթե անգամ ֆիզիկական ուժ եմ կիրառել, չեմ եղել օրենքի սահմաններում»,- զեկուցում է Վալերի Օսիպյանը։

Մհեր Արշակյան