05.01.2025 | 21:53
Մատուցվեց Սուրբ ծննդյան ճրագալույցի պատարագ․ ԼՈՒՍԱՆԿԱՐՆԵՐ
«Պնդումները, թե Բաքուն պատրաստվում է նոր պատերազմի, անհիմն են»․ Ադրբեջանի ԱԳՆ-ն արձագանքել է Նիկոլ Փաշինյանին
Քաղաքականություն
23.02.2024 | 15:16
«Հայաստանի վարչապետ Նիկոլ Փաշինյանի՝ France 24 հեռուստաալիքին տված հարցազրույցում մեր երկրի հասցեին անհիմն մեղադրանքները նպատակ ունեն լարվածություն ստեղծել տարածաշրջանում ու ևս մեկ հարված հասցնել խաղաղ գործընթացին։ Այս մասին ասվում է Ադրբեջանի ԱԳՆ-ի հայտարարությունում, որով Բաքուն արձագանքել է ՀՀ վարչապետ Նիկոլ Փաշինյանի հայտարարությանն այն մասին, որ Ադրբեջանը Հայաստանի դեմ հերթական հարձակումն է նախապատրաստում։
Բաքուն նշում է, թե «Գերմանիայի կանցլերի նախաձեռնությամբ ղեկավարների վերջին հանդիպումից հետո Հայաստանի նման հայտարարությունները և որպես դրա վայր Ֆրանսիայի ընտրությունը ՀՀ-ի կողմից Գերմանիայի ջանքերի նկատմամբ անհարգալից վերաբերմունք է և դիտարկվում է որպես խաղաղության գործընթացի վրա Ֆրանսիայի շարունակվող բացասական ազդեցության ցուցանիշ»։
«Պնդումները, թե, իբր, Ադրբեջանը պատրաստվում է հարձակվել Հայաստանի վրա, չեն համապատասխանում միջազգային իրավունքի սկզբունքներին, առկա փաստերի ակնհայտ խեղաթյուրում են և նպատակ ունեն մոլորեցնել միջազգային հանրությանը։ Լիովին անհիմն են հայտարարություններն այն մասին, թե Ադրբեջանը պատրաստվում է պատերազմի, հնչեցված հայկական կողմից, որը վերջին շրջանում շուրջ 5 ամիս շարունակ իրականացնում է զանգվածային ռազմականացման քաղաքականություն և ապակայունացնում է իրավիճակը տարածաշրջանում»,- ասվում է հայտարարության մեջ։
Բաքուն չի ընդունում երկու երկրների ինքնիշխանության և տարածքային ամբողջականության ճանաչման կարևորությունը 1991 թվականի Ալմա-Աթայի հռչակագրով, տարածաշրջանում տրանսպորտային և տնտեսական կապեր հաստատելու համար երկրների ինքնիշխանության, իրավասության և իրավահավասարության սկզբունքներն ու շարունակում է խառնվել ՀՀ ներքին գործերին։
«Բոլորին հայտնի է, որ Հայաստանի Սահմանադրությամբ, գործող օրենսդրական ակտերով, պաշտոնական նամակներով ու հայտարարություններով, միջազգային կազմակերպություններում և դատարաններում տարածված փաստաթղթերում Ադրբեջանի տարածքային ամբողջականության դեմ պահանջների շարունակությունը հաստատում է, որ Հայաստանի ղեկավարությունը շահագրգռված չէ հայ-ադրբեջանական խաղաղության օրակարգի առաջմղմամբ։ Կոչ ենք անում հայկական կողմին, որը շարունակում է ագրեսիվ զրպարտչական հռետորաբանություն կիրառել մեր երկրի դեմ՝ օգտագործելով տարբեր միջազգային հարթակներ, հրաժարվել խաղաղության հեռանկարներին վնասող հայտարարություններից և օգտագործել ստեղծված հնարավորությունները՝ Հարավային Կովկասի տարածաշրջանը վերածելու խաղաղություն և համագործակցության տարածքի»,- ասվում է հայտարարության մեջ։
Հիշեցնենք՝ Նիկոլ Փաշինյանը France 24-ին տված հարցազրույցում հայտարարել էր, որ Ադրբեջանը պատրաստվում է նոր պատերազմի։ Նա նշել էր, որ երկու երկրների միջև խաղաղ կարգավորման խոստումները տեղում հերքվում են Ադրբեջանի գործողություններով։ Նիկոլ Փաշինյանը հայտարարել էր, որ Բաքուն այսօրվա Հայաստանը համարում է «Արևմտյան Ադրբեջան», իսկ Ադրբեջանի նախագահ Իլհամ Ալիևը ոչ թե խաղաղության պայմանագիր է ցանկանում, որը հիմնված է տարածքային ամբողջականության փոխադարձ ճանաչման վրա, այլ ավելի շուտ ձգտում է Հայաստանից նոր տարածքներ գրավել։
Էմմա Չոբանյան
