Սալոմե Զուրաբիշվիլին չի շնորհավորել Ալիևին․ երկրի բարձրաստիճան պաշտոնյաները նրան մեղադրել են Վրաստանի շահերին վնաս հասցնելու մեջ

Վրաստանի նախագահ Սալոմե Զուրաբիշվիլին վնասում է երկրին՝ ձեռնպահ մնալով Իլհամ Ալիևին Ադրբեջանի նախագահական ընտրություններում հաղթելու կապակցությամբ շնորհավորելուց։ Այս մասին կառավարության նիստից հետո տեղի ունեցած ճեպազրույցում հայտարարել է Վրաստանի փոխվարչապետ, մշակույթի և սպորտի նախարար Թեա Ծուլուկիանին, գրում է ՏԱՍՍ-ը։

«Պարոն Ալիևին հաղթանակի կապակցությամբ շնորհավորելուց ձեռնպահ մնացած Վրաստանի նախագահի լռությունը, կարծում եմ, վնասում է մեր երկրին։ Մենք ուզում ենք հիշեցնել մեր նախագահին, որ սա տարածաշրջան է, որտեղ աշխարհաքաղաքական ռիսկերն ու անվտանգային ռիսկերը մեծացել են վերջին տարիներին։ Վրաստանի կառավարությունն ամեն օր հոգ է տանում, որպեսզի ապահովագրի այդ ռիսկերը և այդ ֆոնին նախագահը, որը հանդիսանում է զորքերի գերագույն հրամանատարը, ձեռնպահ է մնում մեր հարևանին, գործընկերոջը, պետության ընկերոջը շնորհավորելուց ընտրություններում հաղթանակի կապակցությամբ։ Դա քաղաքական կարճատեսություն է հանդիսանում»,- ասել է Ծուլուկիանին։

Նա հավելել է, որ Զուրաբիշվիլիի նպատակը պետք է լինի Ադրբեջանի հետ գործընկերային հարաբերությունների պահպանումն ու զարգացումը, սակայն նա անում է հակառակը։

Սալոմե Զուրաբիշվիլիին քննադատել է նաև Վրաստանի փոխվարչապետ, պաշտպանության նախարար Իրակլի Չիկովանին։

«Ինձ համար անհասկանալի է այն անգործությունը, որ նախագահը ցուցաբերում է այս ուղղությամբ, քանի որ բոլորը հասկանում են, որ մենք ունենք ռազմավարական գործընկերություն և համագործակցություն Ադրբեջանի Հանրապետության հետ։ Մենք հատուկ հարաբերություններ ունենք Ադրբեջանի ղեկավարի հետ, որը մեկ անգամ չէ, որ նպաստել է մեր երկրների միջև հաջող նախագծերի իրականացմանը»,- ասել է Չիկովանին կառավարության նիստից հետո ճեպազրույցում։