Ես չեմ իջնում իրենց մակարդակի, իրենց մանիպուլյացիաները ծիծաղելի են. ՀՔԾ պետը՝ Քոչարյանի փաստաբանների մասին. ՏԵՍԱՆՅՈՒԹ

Ռոբերտ Քոչարյանի խափանման միջոցը փոխելու հարցը պետք է լուծի դատախազը: Այսօր կառավարության նիստից առաջ լրագրողների հետ զրույցում ասաց ՀՔԾ պետ Սասուն Խաչատրյանն՝ անդրադառնալով ԱԺ 41 պատգամավորի՝ երկրորդ նախագահի խափանման միջոցը փոխելու պահանջով ստորագրահավաքին:

Այդուհանդերձ, Սասուն Խաչատրյանը շեշտեց, որ Քոչարյանին կալանքի տակ պահելն անհրաժեշտ է։

Factor.am-ը ՀՔԾ պետին խնդրեց արձագանքել Քոչարյանի փաստաբանների այն պնդումներին, որ իրենց պաշտպանյալի նկատմամբ քաղաքական հետապնդում է իրականացվում, իսկ առաջադրված մեղադրանքն էլ իրավական առումով անգրագետ է ձևակերպված. «Ես չեմ իջնում իրենց մակարդակին և անձնական վիրավորանքներով պատասխանել չեմ ցանկանում: Մեղադրանքի որոշումն այնքան հստակ, պարզ և հիմնավորված է, որ ինձ համար նույնիսկ անհասկանալի են, տեղ-տեղ նույնիսկ ծիծաղելի են այն մանիպուլյացիաները, որոնք փորձում են անել պաշտպանական կողմի ներկայացուցիչները: Ռոբերտ Քոչարյանը մեղադրվում է սահմանադրական կարգը բռնի տապալելու մեջ: Նման մեղադրանք առաջադրելու համար հիմք է հանդիսացել բանակի ներգրավումը: Բանակի ներգրավումը քաղաքական գործընթացներում արգելված է ինչպես նախկին, այնպես էլ Սահմանադրությամբ ներկայիս խմբագրությամբ: Բանակի ներգրավումը քաղաքական գործընթացներում անթույլատրելի է: ԶՈւ ներգրավումը կարող էր թույլատրելի լիներ միայն այն դեպքում, եթե հայտարարված լիներ ռազմական դրություն: Ռազմական դրություն հայտարարված չի եղել: Սա այնքան պարզ է, որ ես նույնիսկ չեմ հասկանում այս աղմուկը, որ բարձրացվել է»:

Մանրամասները՝ տեսանյութում։