06.08.2026 | 09:38
ՀՀ տարածքում ավտոճանապարհներն անցանելի են
Երասխում կառուցվող գործարանը չի տեղափոխվի․ Թեհմինա Վարդանյան
14.09.2023 | 16:24
Երասխում կառուցվող մետաղաձուլարանը չի տեղափոխվի․ Factor.am-ին վստահեցրեց «Ջի Թի Բի Սթիլ Հոլդինգս» ՍՊԸ ղեկավար կազմի անդամ Թեհմինա Վարդանյանը։
«Գործարանը որևէ տեղ չի տեղափոխվում, գործարանից տեղափոխվել է տեխնիկան, բայց մետաղաձուլարանը կես տարի, թե մեկ տարի հետո լինելու է Երասխում»,- ասաց Վարդանյանը։
Ճշտող հարցին՝ այդ դեպքում ինչո՞ւ է տեղափոխվել տեխնիկան, Վարդանյանը պատասխանեց․ «Անդադար կրակահերթի տակ է, այս պահին դադարեցվել են աշխատանքները, բայց վստահեցնում եմ՝ վերսկսվելու ու շարունակվելու են»։
Հիշեցնենք՝ երեկվանից համացանցում տեղեկություններ են շրջանառվում, որ Երասխում հայ-ամերկյան ներդրումներով կառուցվող մետաղաձուլարանը տեղափոխվում է։ Սկզբնաղբյուրը ՀՀ-ում ԵՄ դիտորդական առաքելությունն էր, որ կեսգիշերին X-ի միկրոբլոգում գրել էր, թե վերջին շաբաթներին իրենք կանոնավոր պարեկություն են իրականացնում Երասխի հատվածում`«դիտարկելու և հսկելու գործարանի ապամոնտաժումը և իրենց ներկայությամբ նպաստելու նյութերի և սարքավորումների անվտանգ տեղափոխմանը այլ վայր»։ Առավոտյան այս գրառումը ԵՄ դիտորդական առաքելության միկրոբլոկից հեռացվել էր։
Հիշեցնենք, որ Ադրբեջանը պարբերաբար կրակում է Երասխի մետաղաձուլական գործարանի ուղղությամբ, և աշխատակիցները ստիպված են լինում դադարեցնել իրականացվող աշխատանքները։
Արփի Հակոբյան
