14.10.2026 | 18:32
Ուկրաինայի 3-րդ բանակային կորպուսը հայտնել է Լիմանի մոտ նոր հաջողությունների մասին
ՀՀ գյուղատնտեսության նախարարությունում տեղի է ունեցել ՀՀ գյուղատնտեսության նախարարին կից հասարակական խորհրդի հերթական նիստը
10.07.2018 | 17:17
ՀՀ գյուղատնտեսության նախարարությունում տեղի է ունեցել ՀՀ
գյուղատնտեսության նախարարին կից հասարակական խորհրդի հերթական նիստը, որը
վարում էր ՀՀ գյուղատնտեսության նախարար, խորհրդի նախագահ Արթուր
Խաչատրյանը։
Նիստի սկզբում օրակարգի առաջին կետով ՀՀ գյուղատնտեսության նախարար Արթուր
Խաչատրյանը ներկայացրել է ՀՀ գյուղատնտեսական քաղաքականության
առաջնահերթություններն ու զարգացման առաջիկա տեսլականը։ Նախարարի խոսքով՝
առաջնահերթ մոտեցումներից է լինելու ավելացնել պետության կարգավորիչ դերը
գյուղատնտեսության ոլորտում։
Արթուր Խաչատրյանը կարևորել է պետական
սուբսիդավորման քաղաքականության մեջ նոր, առավել արդյունավետ մոտեցումների
կիրառումը։ Նա հավելել է, որ քննարկվող տարբերակներից է վերջնական
սպառողին աջակցության տրամադրումը՝ վերահսկման մեխանիզմների ներդմամբ,
մյուս տարբերակը՝ փոքր տնայնագործական տնտեսություններին աջակցումը։
Նախարարը տեղեկացրել է նաև, որ ուշադրության կենտրոնում է լինելու
գյուղատնտեսական արժեշղթաների զարգացումը, օգտագործվող հողատարածքների
ծավալների ավելացումը, օրգանական և բարձրարժեք գյուղատնտեսությունը։
«Հոկտեմբերին կսկսեն խոշոր եղջերավոր կենդանիների համարակալման
աշխատանքները, իսկ մյուս տարվա սկզբից կմեկնարկի գյուղապահովագրության
պիլոտային ծրագիրը. ընտրվել են Արմավիրի և Արարատի մարզերում ՝ խաղողը և
պտուղը և Շիրակի մարզում՝ հացահատիկն ու կարտոֆիլը, որոնք կապահովագրվեն
կարկուտի և ցրտահարության ռիսկերից»,- նշել է Արթուր Խաչատրյանը։
Նախարարն անդրադարձել է նաև գյուղացիական վարկերի տույժ-տուգանքների
զիջման՝ կառավարության նախաձեռնությանը՝ շեշտելով, որ որոշումը վերաբերում
է մինչև 2018թ. մայիսի 1-ը կուտակված ժամկետանց պարտավորությունների գծով
տույժ-տուգանքների դուրսգրմանը։
Նախարարը խորհրդի անդամներին տեղեկացրել է նաև, որ վերջերս աշխատանքնային
այցով Արցախի Հանրապետությունում էր, որտեղ հանդիպումներ է ունեցել նախագահ
Բակո Սահակյանի, պետնախարար Գրիգորի Մարտիրոսյանի և գյուղատնտեսության
նախարար Ժիրայր Միրզոյանի հետ, պայմանավորվածություն է ձեռք բերվել,
որպեսզի բոլոր ծրագրերում ընդգրկվեն նաև Արցախի գյուղնախարարության
աշխատակիցները և գյուղացիական տնտեսությունների ներկայացուցիչները։
Զեկուցումից հետո նախարարը պատասխանել է խորհրդի անդամների կողմից
բարձրացված մի շարք հարցերի։
Օրակարգի երկրորդ հարցով խորհրդի աշխատակարգով սահմանված կարգով
իրականացվել է վիճակահանություն՝ ռոտացիոն կարգով խորհրդի նոր անդամների
համալրման նպատակով։
ՀՀ գյուղատնտեսության նախարարության տեղեկատվության
և հասարակայնության հետ կապերի բաժին
