14.10.2026 | 19:16
Դավիթ Խուդաթյանը ՀՀ քաղավիացիայի կոմիտեի աշխատակազմին է ներկայացրել կոմիտեի նորանշանակ նախագահին
Ուկրաինայի 3-րդ բանակային կորպուսը հայտնել է Լիմանի մոտ նոր հաջողությունների մասին
Քաղաքականություն
14.10.2026 | 18:32
Ուկրաինայի 3-րդ բանակային կորպուսի հրամանատար Անդրեյ Բիլեցկին հայտարարել է Դոնեցկի մարզի հյուսիսում, այսպես կոչված, «Վիվալդի» գործողության հերթական փուլի հաջող ավարտի մասին։ Նրա խոսքով՝ կորպուսն ու նրան կցված ստորաբաժանումները ռուսական զորքերի դեմ հարձակման ընթացքում Լիմանի ուղղությամբ ազատագրել են Զելյոննայա Դոլինա, Լիպովոյե և Կոլոձի բնակավայրերը՝ Ուկրաինայի վերահսկողությանը վերադարձնելով ևս 101 քառակուսի կիլոմետր տարածք, գրում է Current time-ը։
Այս հայտարարությունը հաստատում է նաև DeepState վերլուծական նախագիծը, որն իր քարտեզում արտացոլել է փոփոխությունները։ Խոսքը համեմատաբար խոշոր մարտավարական հաջողության մասին է, որի արդյունքում ռուսական զորքերը հետ են մղվել Լիման քաղաքից։
«Մենք թույլ չտվեցինք հակառակորդին թևերից շրջանցել Սլավյանսկ-Կրամատորսկ ագլոմերացիան և այն վերցնել աքցանի մեջ, ինչպես նաև պաշտպանեցինք Խարկով-Սլավյանսկ մայրուղին։ Հակառակորդին չհաջողվեց կտրել Դոնբասում մեր խմբավորման հիմնական լոգիստիկ ուղին»,- գրել է Բիլեցկին։
Նրա գնահատմամբ՝ ամռանը մեկնարկած գործողության ամբողջ ընթացքում ռուսական զորքերի կորուստները կազմել են 8 հազար մարդ։ Նշվում է, որ, ընդհանուր առմամբ, ամռանից ի վեր այս ուղղությամբ Ուկրաինայի վերահսկողության տակ է անցել 16 բնակավայր։
Ռուս զինվորականները չեն մեկնաբանել ուկրաինական կողմի հայտարարությունները։ Պատերազմին աջակցող տելեգրամ ալիքներն ու, այսպես կոչված, ռազմական թղթակիցներն ավելի վաղ ընդունել էին Լիմանի ուղղությամբ առկա խնդիրներն ու մի շարք հատվածներում ռուսական զորքերի նահանջը։
Միևնույն ժամանակ, Ռուսաստանի Պաշտպանության նախարարությունը նախկինում պնդել էր, թե Լիման քաղաքում «մաքրում» է ընթանում։ ՌԴ նախագահ Վլադիմիր Պուտինը սեպտեմբերին նույնիսկ հայտարարել էր, որ ռուս զինվորականները վերահսկողության տակ են վերցրել Սվյատոգորսկ քաղաքը, որը, ըստ առկա տվյալների, գտնվում է ուկրաինական թիկունքում՝ ռազմաճակատի գծից շուրջ 10-15 կիլոմետր հեռավորության վրա։ Չնայած տեսանյութերով հաստատվել էր, որ քաղաքը գտնվում է Ուկրաինայի վերահսկողության տակ, Մոսկվայում Պուտինի խոսքերը չեն հերքել։
Թարգմանությունը՝ Էմմա Չոբանյանի
