Դատարանը պարտավորեցրել է Հակակոռուպցիոն կոմիտեին վարույթ նախաձեռնել Կույրերի միավորման գույքերի վերաբերյալ հաղորդման հիման վրա

Հակակոռուպցիոն դատարանը պարտավորեցրել է Հակակոռուպցիոն կոմիտեին քրեական վարույթ նախաձեռնել «Հայաստանի կույրերի միավորում» ՀԿ-ի անդամների հաղորդման հիման վրա։ Այս մասին տեղեկությունը Factor TV-ի հետ զրույցում հաստատեց միավորման անդամ Արմենակ Խաչատրյանը։

Միավորման անդամները, հիշեցնենք, պնդում են, որ կազմակերպությանը պատկանող անշարժ գույքը տարիներ շարունակ վարձակալության է հանձնվել շուկայականից մի քանի անգամ ցածր գներով, իսկ վարձակալներն այն ենթավարձակալության են հանձնել ավելի բարձր գներով։ Միավորման անդամներից Արմենակ Խաչատրյանը, Վահե Արզումանյանը և Բագրատ Մակարյանը Factor TV-ին ահազանգել էին այն մասին, որ միավորման որոշ տարածքներ վարձակալության են հանձնվել կազմակերպության նախկին ու ներկա ղեկավարության անդամների հետ փոխկապակցված անձանց։ Նրանց պնդմամբ՝ միավորմանը պատկանում է շուրջ 40 հազար քմ ընդհանուր մակերեսով անշարժ գույք՝ մոտ 11 մլրդ դրամ կադաստրային արժեքով։ Գույքերի թվում են Երևանի տարբեր հասցեներում, այդ թվում՝ փոքր Կենտրոնում գտնվող առևտրային և արտադրական տարածքներ, ինչպես նաև Արզնիի առողջարանը։

Միավորման անդամների ներկայացրած տվյալներով՝ օրինակ՝ Քաջազնունի 1 հասցեում գտնվող 117 քմ տարածքը 2013 թվականին վարձակալության է տրվել ամսական 94 հազար 80 դրամով, մինչդեռ 2019-2022 թվականներին այն ենթավարձակալության է հանձնվել ամսական 500 հազար, ապա՝ 550 հազար դրամով։ Կոմիտաս 55 հասցեում գտնվող 116.5 քմ տարածքն էլ 2011 թվականին մինչև 2036 թվականը վարձակալության է տրվել ամսական 112 հազար 340 դրամով, իսկ օրեր անց ենթավարձակալության հանձնվել 500 հազար դրամով։

Միավորման անդամների գնահատմամբ՝ գույքի արդյունավետ կառավարման և շուկայական գներով վարձակալության տրամադրման դեպքում կազմակերպության տարեկան բյուջեն ներկայիս շուրջ 200 մլն դրամի փոխարեն կարող էր հասնել 900 մլն դրամի։ Նրանք պնդում են, որ լրացուցիչ միջոցները հնարավոր կլիներ ուղղել միավորման անդամների կարիքներին, կրթական ծրագրերին և զբաղվածության ապահովմանը։

Գույքերի վարձակալության պայմանների և հնարավոր չարաշահումների վերաբերյալ միավորման անդամները 2025-ի տարեվերջին  հանցագործության մասին հաղորդում էին ներկայացրել, սակայն վարույթ չէր նախաձեռնվել։ Այս որոշումը բողոքարկվել էր դատական կարգով։ Հակակոռուպցիոն դատարանը, սակայն, մերժել էր միավորման անդամների բողոքը: Այս որոշման դեմ վերաքննիչ բողոք էր ներկայացվել։ Հակակոռուպցիոն դատարանի դատավոր Սուրեն Խաչատրյանը, քննելով բողոքը, որոշել էր առաջին ատյանի դատական ակտը բեկանել և գործը կրկին ուղարկել Հակակոռուպցին դատարան՝ նոր քննության։ Նոր քննության արդյունքում դատավոր Վարդգես Սարգսյանը Հակակոռուպցիոն կոմիտեին պարտավորեցրել է վարույթ նախաձեռնել։

Արաքս Մամուլյան