Ադրբեջանի ԱԳՆ-ն արձագանքել է Փաշինյանի՝ Բաքվի կողմից Լաչինի միջանցքի ապօրինի փակման, Արցախում հումանիտար ճգնաժամ ստեղծելու հայտարարությանը

Ադրբեջանի ԱԳՆ-ն արձագանքել է ՀՀ վարչապետ Նիկոլ Փաշինյանի՝ կառավարության այսօրվա նիստում Լաչինի միջանցքի ապօրինի փակման վերաբերյալ արված հայտարարություններին։

«Վճռականորեն մերժում ենք հունիսի 22-ին կառավարության նիստում ՀՀ վարչապետ Նիկոլ Փաշինյանի հնչեցրած անհեթեթ մտքերը, թե, իբր, Ադրբեջանը, հակառակ Արդարադատության միջազգային դատարանի որոշման, ապօրինի շրջափակում է Լաչինի ճանապարհը»,- ասվում է հայտարարության մեջ։

Բաքուն շարունակում է ՄԱԿ-ի Միջազգային դատարանի՝ պարտադիր կատարման ենթական որոշման հետ կապված կեղծ թեզեր հնչեցնել՝ միաժամանակ խոստավանելով, որ հենց ինքն է արգելափակում Լաչինի միջանցքով ազատ երթևեկությունը՝ նշելով, որ պատճառը հունիսի 15-ին, իբր, ՀՀ ԶՈՒ-ի «սադրանքն է»։ Հավելենք, որ հունիսի 15-ին Հակարիի կամրջի մոտ ադրբեջանական ԶՈՒ-ն փորձել էր դրոշ տեղադրել ՀՀ ինքնիշխան տարածքում։

Բացի այդ, Բաքուն կրկին հրաժարվում է Ստեփանակերտի հետ միջազգային մեխանիզմով երկխոսությունից՝ նշելով, որ դա «Ադրբեջանի ներքին գործն է»։

Հիշեցնենք՝ Նիկոլ Փաշինյանը նշել էր, որ պարտադիր իրավական ուժ ունեցող որոշմամբ դատարանն Ադրբեջանին պարտավորեցրել է ձեռնարկել իրեն հասու բոլոր միջոցները՝ երաշխավորելու Լաչինի միջանցքով քաղաքացիների, տրանսպորտային միջոցների և բեռների՝ երկու ուղղություններով անխափան տեղաշարժը: Դատարանը որոշել է նաև, որ իր որոշումը պարտադիր իրավական ուժ է առաջացնում Ադրբեջանի համար, որը, սակայն, Բաքուն չի կատարում։

Էմմա Չոբանյան