Հասարակություն
05.06.2023 | 11:38«Անչափահասների նկատմամբ բռնության կիրառումը այն անձանց կողմից, ումից երեխաներն անկնկալում են պաշտպանություն (կլինեն դրանք իրավապահ մարմինների ներկայացուցիչները, թե ծնողները կամ ուսուցիչները) շատ ավելի մեծ բացասական ազդեցություն է ունենում։ Այս առումով, կարծում եմ, իրավապահի կողմից երեխայի ծեծի ենթարկվելը նրա վրա բռնության ազդեցությունը կրկնապատկել է,- այս մասին «Ո՞վ պետք է պաշտպանի երեխայի իրավունքները» թեմայով քննարկման ժամանակ նշեց Երեխաների պաշտպանության ցանցի խորհրդի անդամ, Վորլդ Վիժն Հայաստանի երեխաների պաշտպանության ծրագրի ղեկավար Աիդա Մուրադյանը՝ անդրադառնալով վերջերս Դիլիջանի քրեականի պետի կողմից 16-ամյա տղային ծեծի է ենթարկելու դեպքին։
Փորձագետի դիտարկմամբ՝ այս մասնավոր դեպքի մասին խոսելով՝ կարելի է առնվազն երեք համակարգային խնդրի մասին բարձրաձայնել․ «Առաջին՝ անչափահասների նկատմամբ բռնությունը ամենացցուն օրինակն է, այն շարունակում է մնալ լուրջ խնդիր Հայաստանում, շատ դեպքերում քրեական գործ չի հարուցվում, և մենք չենք իմանում այդ դեպքերի մասին։
Երկրորդ համակարգային խնդիրը, որը, կարծում եմ, պետք է քննվի նաև Առողջապահության և աշխատանքի տեսչության կողմից, աշխատանքում ներգրավված երեխաների իրավունքների պաշտպանությունն է։ Այստեղ բարեփոխումների լուրջ կարիք ունենք։
Եվ երրորդը՝ երեխաների մասնակցությամբ, երեխաների վերաբերյալ նյութերի լուսաբանումն է։ Անչափահասի ծեծի դեպքով նման աղմուկ եթե չլիներ, կասկածում եմ, որ այսօր կալանքի որոշում կլիներ։ Լրատվամիջոցների և քաղհասարակության արձագանքի շնորհիվ է, որ այսօր այս արդյունքն ունենք։ Բայց արդյո՞ք հնարավոր չէր այս նույն նյութը ցուցադրել՝ փակելով երեխայի դեմքը»։
Մանրամասները՝ տեսանյութում։
