Հիվանդաորսության էլեմենտներ կան․ մարզերում բաց դռների օրերի էպիդեմիա ոնց որ լինի․ Թորոսյանը՝ Ավանեսյանին

ՀՀ ԱԺ առողջապահության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում հունիսի 1-ին շարունակվեց «Հայաստանի Հանրապետության 2022 թվականի պետական բյուջեի կատարման մասին» հաշվետվության քննարկումը:
Քննարկվեց առողջապահության ոլորտի եկամուտների և ծախսերի կատարողականը:

Առողջապահության նախարար Անահիտ Ավանեսյանը ներկայացրեց նախարարության իրականացրած 12 ծրագրերն ու դրանց կատարողականները, որոնց շրջանակներում կյանքի է կոչվել 51 միջոցառում:

«Վերջերս մի տարօրինակ երևույթի ենք ականատես լինում, որը կոչվում է՝ բաց դռների օրեր, կարծես մի էպիդեմիա լինի, Երևանի մասնավոր և պետական հիվանդանոցներն ամբողջ օրը մարզերում բաց դռների օրեր են անում,- դիմելով առողջապահության նախարարին՝ նշեց ԱԺ պատգամավոր, առողջապահության նախկին նախարար Արսեն Թորոսյանը։ -2018թ առաջ դա նախընտրական փուլում էր տեղի ունենում, գիտենք, թե ինչի համար։ Բայց տարօրինակ է, որ գովազդ է դրվում առողջապահության նախարարության կայքէջում՝ մարզային հիվանդանոցում արտասհամանից եկած գործընկերների կողմից իրականացվող լեղապարկի վիրահատության վերաբերյալ․․․ Այստեղ հիվանդաորսության էլեմենտներ կան։ Երևանից գնում բարեհամբույր կերպով սոնոգրաֆիա են անում, ասում՝ կգաս Երևան, քո ցավի հարցը կլուծենք» ։

Անահիտ Ավանեսյանն արձագանքեց, նշելով, որ այլ երկրներից եկած մասնագետների հետ համագործակցության շրջանակներում կատարվում է փորձի փոխանակում, նոր մեթոդներ են կիրառվում, և համագործակցության այս գործընթացը լինելու է շարունակական։

«Բայց միանշանակ պետք է ուշադրության կոնտրոնում պահել այն, որ մարզային բժշկական կենտրոնների համագործակցությունը Երևանի բժշկական կենտրոնների հետ լինի օրենքի և էթիկայի սահմաններում և մարզային առողջապահական համակարգի զարգացման շրջանակում»,- նշեց նախարարը։

Մանրամասները՝ տեսանյութում։