Միայն ժապավեն կտրելով չի, որակ չկա․ Էռնեստ Ավանեսով․ ՏԵՍԱՆՅՈՒԹ

Ավագանու անդամ Էռնեստ Ավանեսովն այսօր ավագանու նիստում խոսեց համակարգային կոռուպցիայի դրսևորումների և կառավարման կոլապսի մասին:

«Բազմաբնակարան շենքերի ընդհանուր օգտագործման բակեր, ե՞րբ ենք վերջին անգամ եղել, տեսե՞լ եք ինչ վիճակում են այդ բակերը: Արվում են աշխատանքներ, կարծես թե ժամկետով, մինչև սեպտեմբեր, որ թարմ ինչ-որ բան երևան, բայց ի՞նչ է արվում: Կա բոլոր կողմերից ավերված խաղահրապարակ, սալիկների փոփոխության կարիք չկա, սալիկներ են փոխվում, ասում են՝ նպատակ կա հատակը ռետինե դարձնելու, բայց այդ խաղահրապարակը դրանից հետո պետք է փոխվի: Այսինքն՝ ոտք ու գլուխ իրար խառնված, որը առաջնային պետք է լինի, որը երկրորդական, բա դա մասնագիտական մոտեցո՞ւմ է:

Այս համատեքստում քաղաքաշինության ու հողի վերահսկողության վարչությունը, կարգավիճակ չունեցող գույքի բաժնի պետն ընդհանրապես մեկ տարուց ավելի է՝ չի պատասխանում զանգերիս, գրություններիս:
Այս լուրջ խնդիրների համատեքստում պարզվում է, որ ոլորտը կուրացիա անող փոխքաղաքապետերը գնում են արձակուրդ, գալիս են: Կարծում եմ՝ նվիրված աշխատանքի դեպքում որևէ մեկը չպետք է գնա արձակուրդ»,- նշեց Ավանեսովը:

Անդրադառնալով Շենգավիթի համայնքի մարզադպրոցներից մեկին, ավագանու անդամը նշեց․ «Այդ մարզադպրոցում գնումների ընթացակարգով աշխատանքներ կատարվեցին, մեկ ամսվա ընթացքում, կարո՞ղ եք ասել, քանի անգամ վերանորոգում արվեց, կարմիր ժապավենը կտրելուց հետո։ Այնքան փնթի աշխատանք էր արվել, որ անընդհատ կաթում էր կտուրից, մինչև հիմա էլ շատ խնդիրներ կան այնտեղ։ Միայն ժապավեն կտրելով չի, որակ պետք լինի, որակ չկա այդ աշխատանքներում»։

Ավանեսովը նաև աղբավայրի հետ կապված խնդիրներին՝ նկատելով, որ կային ներդրողներ, որոնք ուզում էին աղբահանության հիմնարկ ստեղծել, վերամշակման գործընթաց իրականացնել. «Շատ մարդիկ են եղել՝ ներդրողներ, բայց ճանապարհներ են փակվել այդ մարդկանց առջև, դրա համար ունենք այս խոլերան, այս վիճակը, որ շնչում ենք:

Դեպքերը շատ են, բայց չալաղաջը վերջում ՝ Ծիծեռնակաբերդի խճուղու հետ կապված հարցը. անցած տարի ասում էին՝ ուղիղ մեկ գիծ է մնացել։ Կա՞ տեր քաղաքում, այսօր այդ հատվածում բազմաբնակարան շենք է վեր խոյանում։ Ոնց էր ասում դասականը՝ ցը՛մփ»:

Մանրամասները՝ տեսանյութում։