26.11.2024 | 10:46
Ադրբեջանում Մինգեչաուրի ջրամբարի տարածքում երկրաշարժ է տեղի ունեցել
Թուրքիայի նախագահական ընտրություններում 3-րդ տեղը զբաղեցրած թեկնածուն հայտարարել է երկրորդ փուլում Էրդողանին աջակցելու մասին
Քաղաքականություն
22.05.2023 | 19:33
Սինան Օղանը, որը Թուրքիայի նախագահական ընտրությունների առաջին փուլում հավաքել էր ձայների 5 տոկոսը, հայտարարել է ընտրությունների երկրորդ փուլում գործող նախագահ Ռեջեփ Թայիփ Էրդողանին աջակցելու մասին, հաղորդում է Halk TV-ն։
Նա նշել է, որ երկու թեկնածուների հետ հանդիպման ժամանակ քննարկել է հանրությանը հայտնի առաջնահերթությունները՝ հավելելով, որ զրույցներն ու հանդիպումները երկու թեկնածուների հետ էլ տեղի են ունեցել փոխադարձ քաղաքավարության և հարգանքի շրջանակում։
«Այս բանակցությունների, խորհրդակցությունների և զանգվածային հաղորդագրությունների արդյունքում ես հայտարարում եմ, որ ընտրությունների երկրորդ փուլում մենք աջակցելու ենք Ժողովրդական դաշինքի թեկնածու Ռեջեփ Թայիփ Էրդողանին»,- ասել է Օղանը։
Հավելենք, որ վերլուծաբաններն ի սկզբանե կանխատեսում էին, որ Օղանն աջակցելու է Էրդողանին՝ հաշվի առնելով վերջինի ազգայնական ծրագիրը։
Թուրքական մի շարք լրատվամիջոցներ էլ հաղորդում էին, որ Ադրբեջանի նախագահ Իլհամ Ալիևն օրերս զանգահարել է Սինան Օղանին՝ հորդորելով նախագահական ընտրությունների երկրորդ փուլում աջակցել Ռեջեփ Թայիփ Էրդողանին։
Էմմա Չոբանյան
