Նորմալ չէ, իշխանական կառույցներն օգտագործվում են որպես քարոզչական գործիք ընդդիմադիրների դեմ. Քոչարյան․ ՏԵՍԱՆՅՈՒԹ

ԱԺ «Հայաստան» խմբակցության պատգամավոր Լևոն Քոչարյանը, պատասխանելով Factor TV-ի հարցին, սովորական երևույթ անվանեց ԱԺ միջանցքի տեսախցիկների տեսագրությունների՝ Civic.am-ում հայտնվելը։

«ԱԺ-ից անվտանգության տեսախցիկների տեսանյութերի դուրս գալն արդեն դարձել է սովորական երևույթ, մենք արդեն բազում անգամներ նման բան տեսել ենք նաև Ռոբերտ Քոչարյանի դեպքում, որից հետո Նիկոլ Փաշինյանն ասաց՝ «ԱԱԾ աշխատակիցն ինքը կորոշի՝ ինչ արտահոսի, ինչը՝ չէ»։ Մառազմ է ուղղակի նման բան ասելը»,- ասաց նա։

Քոչարյանը հիշատակեց նաև այլ դեպքեր՝ նշելով, որ նման տեսագրություններ են տարածվել նաև Իշխան Սաղաթելյանի հետ կապված։

«Սա նորմալ չէ, ու սա ևս մեկ անգամ ապացուցում է այն, որ իշխանական կառույցները օգտագործվում են որպես քարոզչական գործիք ընդդիմադիրների դեմ․ կլինեն անվտանգության տեսախցիկները, կլինեն քրեական գործերը, կլինեն Հանրային հեռուստատեսության ռեպորտաժները, այսինքն՝ այս ամեն ինչը ծառայում է մեկ մարդու քաղաքական նպատակները բավարարելու համար, որը օրենքի հետ ոչ մի առնչություն չունի »,- հայտարարեց «Հայաստան» խմբակցության պատգամավորը։

Հիշեցնենք, որ սեպտեմբերի 6-ին իրավիճակը նիստերի դահլիճում լարվել էր, երբ ԱԺ նախագահ Ռուբեն Ռուբինյանը անջատել էր «Ուժեղ Հայաստան» խմբակցության պատգամավոր Էդգար Ղազարյանի խոսափողը՝ նշելով, որ նա օրակարգից չի խոսում։

Դրանից հետո դահլիճում հնչել էին գոռգոռոցներ, պատգամավորների միջև սկսվել էր հրմշտոց ու քաշքշուկ։
Ռուբեն Ռուբինյանը ընդմիջում էր հայտարարել և նիստերի դահլիճ հրավիրել անվտանգության աշխատակիցներին։

Միջադեպից հետո Ռուբինյանը հայտարարել էր, որ «Ուժեղ Հայաստանի» պատգամավորների օգնականները փորձել են մուտք գործել ԱԺ նիստերի դահլիճ, և այդ հանգամանքը քննության առարկա կդառնա։

Միջանցքի տեսախցիկների տեսագրությունը տարածել էր իշխանական Civic.am-ը և գրել․ «Ինչպե՞ս են «Ուժեղ Հայաստանի» ախրանիկ-օգնականները փորձում ներխուժել ԱԺ նիստերի դահլիճ»։

ԱԺ-ից հայտնել են, որ «Ուժեղ Հայաստանի» պատգամավորների 6 օգնականի արգելվել է մուտք գործել ԱԺ տարածք։ Նրանց նկատմամբ կարգապահական վարույթ է նախաձեռնվել՝ նիստերի դահլիճ ներխուժելու փորձերի, ինչպես նաև ԱԺ տարածքում անկարգություններ հրահրելու դեպքերի առնչությամբ։

Մանրամասները՝ տեսանյութում։

Արփի Հակոբյան