ԱՄՆ-ն և Ռուսաստանը քննարկում են «Հյուսիսային հոսք»-ով Եվրոպային գազ վաճառելու հնարավորությունը

Ռուսաստանցի և ամերիկացի բարձրաստիճան պաշտոնյաները բանակցություններ են վարել «Հյուսիսային հոսք» գազատարների նախագծերում ամերիկացի ներդրողի ներգրավման հարցով։ Այս մասին հայտնում է Reuters-ը՝ վկայակոչելով իրազեկ աղբյուրների, գրում է Meduza-ն։

Քննարկումներին մասնակցել են ՌԴ նախագահի՝ ներդրումային և տնտեսական համագործակցության հարցերով հատուկ ներկայացուցիչ, Ռուսաստանի ուղղակի ներդրումների հիմնադրամի (РФПИ) ղեկավար Կիրիլ Դմիտրիևը և ԱՄՆ նախագահ Դոնալդ Թրամփի փեսա Ջարեդ Քուշները։ Երկուսն էլ մասնակցում են նաև ռուս-ուկրաինական պատերազմի դադարեցման շուրջ բանակցություններին։

Վերջին շաբաթներին Դմիտրիևը և Քուշները հանդիպումներ են ունեցել Մոսկվայում և Նյու Յորքում։ Հայտնի չէ, թե որքան մանրամասն են այդ հանդիպումների ընթացքում նրանք քննարկել «Հյուսիսային հոսքերի» հարցը։ Աղբյուրների խոսքով՝ այդ թեման շարունակում է մնալ օրակարգում։ Գործակալության մեկ այլ զրուցակից կարծում է, որ միջնաժամկետ հեռանկարում կողմերը դժվար թե գործարք կնքեն։

Սպիտակ տունը, իր հերթին, նշել է, որ նման ցանկացած գործարք պետք է համաձայնեցվի ԱՄՆ իշխանությունների հետ, իսկ վերջին շրջանում «Հյուսիսային հոսք»-ի վերաբերյալ որևէ քննարկում չի անցկացվել։

Reuters-ը նշում է, որ Քուշները բիզնես համագործակցությունը համարում է խաղաղության համաձայնագրի առանցքային գործոն։ «Հյուսիսային հոսք» նախագծերում ամերիկյան մասնակցության վերաբերյալ գործարքը ԱՄՆ-ին հնարավորություն կտար պատերազմի ավարտից հետո Եվրոպա էներգակիրների մատակարարումներից շահույթ ստանալ։

Դմիտրիևը հանդես է գալիս Գերմանիային ռուսական գազի վաճառքի վերականգնման օգտին։ Սեպտեմբերին նա հանդիպել էր ԱՄՆ էներգետիկայի և ֆինանսների նախարարությունների ներկայացուցիչների հետ և քննարկել էներգետիկ ոլորտում ամերիկա-ռուսական հնարավոր նախաձեռնությունները։

Գերմանիան Եվրոպայի ամենամեծ էներգակիր սպառողն է։ Անհասկանալի է, թե որքանով է Վաշինգտոնը հետաքրքրված այդ  երկրին ռուսական գազի մատակարարումը վերսկսելով։ Մինչև Ռուսաստանի կողմից Ուկրաինա լայնածավալ ներխուժումը, Գերմանիայի գազի մեծ մասը Ռուսաստանից մատակարարվում էր «Հյուսիսային հոսք 1» և «2» խողովակաշարերով։ Պատերազմի սկսվելուց հետո մատակարարումները դադարեցվել են, և խողովակաշարերը ենթարկվել ԵՄ-ի և ԱՄՆ-ի պատժամիջոցների։

Սպասվում է, որ Գերմանիան և այլ եվրոպական երկրները, որոնք պատրաստվում են պաշտպանվել ռուսական հիբրիդային հարձակումներից և հնարավոր ներխուժումից, դեմ կլինեն «Հյուսիսային հոսքի» աշխատանքի  վերսկսմանը։

Թարգմանությունը՝ Էմմա Չոբանյանի