18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
Ալիևը զանգահարել է Թուրքիայի նախագահի թեկնածու Սինան Օղանին՝ միջնորդելով աջակցել Էրդողանին
Քաղաքականություն
22.05.2023 | 11:55
Թուրքական մի շարք լրատվամիջոցներ հաղորդում են, որ Ադրբեջանի նախագահ Իլհամ Ալիևը օրերս զանգահարել է Թուրքիայի նախագահի թեկնածու Սինան Օղանին՝ միջնորդելով նախագահական ընտրությունների երկրորդ փուլում աջակցել Ռեջեփ Թայիփ Էրդողանին։ Yeni Akit-ը, գրում է, որ Ալիևը Օղանին մասնավորապես ասել է․«Եթե Էրդողանը չընտրվի շատ վատ կլինի բոլորիս համար։ Դրա պատճառը մի՛ դարձեք»։
Թերթի լրագրող Ջան Աթաքլին, հղում անելով «Աթա» դաշինքում իր աղբյուրներին, հայտում է, որ Օղանը ավելի հակված է եղել չեզոք մնալ նախագահական ընտրությունների երկրորդ փուլում։ Մայիսի 19-ին Օղանը հանդիպել էր Էրդողանի հետ։ Լրատվամիջոցի աղբյուրն ասել էր, որ անհանգստացած են այդ հանդիպումից և «լավ չէ, որ Օղանը հանդիպել է Էրդողանին»։ Թուրքիայի նախագահական ընտրություններում 5 տոկոս ձայն ստացած Օղանը պատրաստվում է այսօր հայտարարել՝ ում է ստարելու՝ Էրդողանին, թե ընդդիմության թեկնածու Քեմալ Քըլըչդարօղլուին։ Թուրքական իշխանամետ լրատվամիջոցները գրում են, որ Օղանը մտադիր է աջակցություն հայտնել Էրդողանին։
Նշենք, որ Սինան Օղանը ծնվել է Իգդիր քաղաքում ադրբեջանցիների ընտանիքում։ Նա սովորել է Մոսկվայի պետական համալսարանում, վարժ տիրապետում է ռուսերենին և անգլերենին, աշխատել է Թուրքիայի և Ադրբեջանի մի շարք համալսարաններում։ Կապեր ունի և՛ ՌԴ-ի, և ՛ Ադրբեջանի հետ։ Նա նաև եղել է Թուրքիայի համագործակցության և համակարգման գործակալության (TIKA) ներկայացուցիչը Բաքվում, որտեղ նախագահ Իլհամ Ալիևի կողմից պարգևատրվել է պետական մեդալով։
Էմմա Չոբանյան
