Մենք առայժմ չենք դարձել բռնությունից ազատ հասարակություն. ապաքաղաքական զրույց Մարգարիտա Հակոբյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «ՕքսԵՋեն» կանանց և երիտասարդների իրավունքների պաշտպանության հիմնադրամի համահիմնադիր և գործադիր տնօրեն Մարգարիտա Հակոբյանը: Նրա կարծիքով՝ խորհրդարանական ընտրություններում կանանց համար քվոտաների սահմանումը որոշ չափով բարելավել են վիճակը, սակայն պետք է խնդիր դրվի, որ կանայք լինեն ոչ միայն կուսակցական ցուցակներում, այլև որոշումներ ընդունողների շարքերում:

Խոսելով բիզնեսում կանանց ներգրավվածության մասին՝ հաղորդման հյուրը մեծ խնդիր չի տեսնում կին և տղամարդ գործարարների աշխատանքային շփումների մեջ: Խնդիրը, նրա կարծիքով, ոչ թե արգելքների առկայությունն է, այլ հնարավորությունների բացակայությունը: Նույն բացատրությունը տիկին Հակոբյանն ունի այն փաստին, որ հատկապես խոշորացված համայնքներում կին ղեկավարներ գրեթե չկան:

Անդրադառնալով ընտանեկան բռնությանն առնչվող օրենքներին և դրանցից՝ հայաստանցի որոշ տղամարդկանց դժգոհությանը, «ՕքսԵՋեն»-ի ղեկավարն իր անհամաձայնությունն է հայտնում այն կարծիքի հետ, որ դա զուտ ներքին, ընտանեկան խնդիր է: Բռնության բացառումը պետք է լինի ամբողջ հասարակության խնդիրը: Դրան պետք է նպաստեն ոչ միայն օրենքների խստությունը, այլև բոլորի կողմից ընդունված վարքային կանոնները:

Տիկին Հակոբյանը ցավով նշում է, որ մենք դեռևս չենք դարձել բռնությունից ազատ հասարակություն: Պատճառը, նրա կարծիքով, այն է, որ մեզանում դեռևս ուժեղ են կարծրատիպերը, որոնք իրենց հերթին բերում նախապաշարումների: Դրանցից ազատվելը պահանջում է ինչպես անհատական ջանքեր, այնպես էլ հասարակական մշտական ուշադրություն:

Մանրամասները տեսանյութում:

Արամ Աբրահամյան