25.07.2026 | 19:46
Համբուրգ․ Էլինա Ավանեսյանը պարտվեց կիսաեզրափակիչում. ՏԵՍԱՆՅՈՒԹ
Լաչինում ապօրինի անցակետի տեղադրումից հետո Բաքուն դադարեցնում է «էկոակտիվիստների» ակցիան
Քաղաքականություն
28.04.2023 | 16:33
Լաչինի միջանցքում ապօրինի անցակետի տեղադրումից հետո Ադրբեջանի իշխանությունները որոշել են դադարեցնել, այսպես կոչված, «էկոակտիվիստների» ակցիան։
Հիշեցնենք՝ Ադրբեջանի իշխանությունների կողմից ուղղորդված ու վերահսկվող տարբեր կազմակերպությունների, զինված ուժերի ներկայացուցիչներ դեկտեմբերի 12-ից փակել էին Լաչինի միջանցքը։ Բաքուն չէր կատարում նաև փետրվարի 22-ի ՄԱԿ-ի Արդարադատության միջազգային դատարանի՝ միջանցքը բացելու որոշումը։
Ադրբեջանական քարոզչական ԶԼՄ-ները հայտնում են, որ «էկոակտիվիստները, հաշվի առնելով իրենց պահանջների մասնակի կատարումը, որոշել են 2023 թվականի ապրիլի 28-ին ժամը 18:00-ից ժամանակավորապես դադարեցնել բողոքի ակցիան»։
Հավելենք, որ այսօր նրանք հանդիպել են օկուպացված Շուշիում Ադրբեջանի նախագահի հատուկ ներկայացուցիչ Այդին Քերիմովին, որը նշել է, թե «ապրիլի 23-ին նոր իրավիճակ է ստեղծվել՝ կապված Պետական սահմանային ծառայության ստորաբաժանումների կողմից անցակետի ստեղծման հետ»։ Նա հրահանգել է դադարեցնել ակցիան։
Հիշեցնենք, որ ապրիլի 23-ին Ադրբեջանն ապօրինի անցակետ է տեղադրել Հակարի կամրջի վրա՝ փաստացի շարունակելով Արցախի շրջափակումը։
Էմմա Չոբանյան
