Վլադիմիր Գասպարանի թիկնազորի պետի եղբայրն ու ընկերները դատարանի որոշմամբ ազատ են արձակվել. նրանք ազատ կարող են լքել երկիրը. Aravot.am

Վլադիմիր Գասպարյանի թիկնազորի պետի եղբայրն ու ընկերները դատարանի որոշմամբ ազատ են արձակվել: Էրեբունիում անչափահասին ծեծելու գործով կալանքի տակ էին Գագիկ Ազարյանը, Սարգիս Բաղդասարյանը, Վլադիմիր Մխիթարյանը, ՀՀ նախկին ոստիկանապետ Վլադիմիր Գասպարյանի թիկնազորի պետ Արշակ Հակոբյանի եղբայր Սարգիս Հակոբյանը: Սակայն, օրերս Վերաքննիչ քրեական դատարանը բավարարել է վերաքննիչ բողոքներն ու նրանց կալանքից ազատ արձակելու որոշում կայացրել: Այս մասին Aravot.am-ի հետ զրույցում ասաց նրանց պաշտպան Էրիկ Ալեքսանյանը:

Նրա խոսքերով՝ Վլադիմիր Մխիթարյանին ազատ են արձակել 2 օր առաջ, իսկ մյուսներին, 1-2 օրվա տարբերությամբ, ավելի շուտ են ազատ արձակել: Մեր հարցին՝ գրավի՞ դիմաց են ազատ արձակել, փաստաբանը պատասխանեց. «Ոչ, առանց գրավի, որեւէ խափանման միջոց չկա»: Գագիկ Ազարյանին, Սարգիս Բաղդասարյանին եւ Վլադիմիր Մխիթարյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով, իսկ Սարգիս Հակոբյանին՝ 258-րդ հոդվածի 4-րդ մասով՝ խուլիգանություն՝ որպես զենք օգտագործվող առարկաների գործադրմամբ։ Ալեքսանյանի խոսքերով՝ դատարանը որոշել է նրանց ազատ արձակել կալանավորման հիմքերի բացակայության հիմնավորմամբ. «Նրանց բոլորին էլ նույնաբովանդակ հիմքով կալանքը, որպես խափանման միջոց վերացվել է: Ներկայումս նրանք մեղադրյալի կարգավիճակում են, բայց այլ խափանման միջոց ընտրված չէ, այսինքն՝ անգամ ստորագրությամբ երկրից բացակայելու որոշում չկա»:

Մեր հարցին՝ այսինքն՝ ցանկացած պահի նրանք կարո՞ղ են հեռանալ երկրից, փաստաբանը պատասխանեց. «Այո, անգամ որեւէ կաշկանդվածություն չկա երկրից հեռանալու, ազատ տեղաշարժի սահմանափակում չկա: Ուզենան՝ դուրս կգան երկրից, բայց դուրս չեն գա: Մենք սպասում ենք դատարանի որոշմանը, որպեսզի պատշաճ ներկայանանք»: Էրիկ Ալեքսանյանն ասաց, որ ներկայումս նախաքննական փուլն ավարտվել է, մեղադրական եզրակացություն կա, գործն ուղարկվել է դատարան. «Բայց չգիտեմ՝ դատարանը վարույթ ընդունե՞լ է, թե՞ ոչ: Մենք ծանուցում չենք ստացել»: