Երբ ընդհանուր նպատակներ չկան, սկսվում են փոխադարձ մեղադրանքները. ապաքաղաքական զրույց Արտակ Ապիտոնյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Ապագա հայկականը» զարգացման հիմնադրամի գործադիր տնօրեն, արտակարգ և լիազոր դեսպան Արտակ Ապիտոնյանը: Նրա կարծիքով՝ այն կարծրատիպերը, որոնք երբեմն ինքներս ստեղծում ենք մեր մասին, հեռու են իրականությունից:

Հայաստանից դուրս ապրող հայերը հաճախ հանդես են գալիս որպես կարգապահ, պարտաճանաչ մարդկանց և աշխատողների մոդել: Հայաստանում ապրող հայերի հակառակ դրսևորումները պայմանավորված են ոչ թե ազգային մենթալիտետով, այլ պետության ընդհանուր անկազմակերպվածությամբ: Բոլոր դեպքերում, Արտակ Ապիտոնյանի կարծիքով, վարքի, աշխարհընկալման, աշխատանքի հանդեպ վերաբերմունքի ստանդարտները թելադրվում են պետական, քաղաքական, մտավոր, մշակութային էլիտաների կողմից, և այդ հարցում առաջնահերթ դեր է խաղում կրթական համակարգը:

Հաղորդման հյուրը վստահ է, որ աշխարհի հայերին ավելի շատ բան է միավորում, քան բաժանում: Պարզապես պետք չէ ակնկալել, որ Հայաստանի, ինչպես նաև Սփյուռքի տարբեր համայնքներում ապրող, տարբեր ժամանակներում արտերկրում հայտնված մեր հայրենակիցները որևէ հարցի շուրջ միատեսակ կմտածեն: Պետք է գտնել այն նպատակները, որոնց համար տարբեր ձևով մտածող մարդիկ միասին կաշխատեն: Այդպիսի նպատակներից է, իհարկե, Ցեղասպանության ճանաչումը:

Դիվանագետը համոզված է, որ հանուն Արցախի անվտանգության պայքարը նույնպես կարող է համախմբող դեր խաղալ, եթե Հայաստանից համապատասխան ազդակներ գան, և մեր ներքաղաքական տարաձայնությունները չխանգարեն այդ ազդակների ձևավորմանը: Բոլոր դեպքերում փոխադարձ մեղադրանքներն ի հայտ են գալիս այն ժամանակ, երբ բացակայում են այդ ընդհանուր նպատակները: Խոսելով սնապարծության և ազգային հպարտության տարբերության մասին՝ Արտակ Ապիտոնյանը նշում է, որ երկրորդ դեպքում ստեղծվում է նոր արժեք, իսկ առաջինը բացարձակապես անպտուղ է:

Մանրամասները տեսանյութում:

Արամ Աբրահամյան