Ուզում են կոծկեն դեպքը. նախարարը պիտի հրաժարական տա․ ՏԵՍԱՆՅՈՒԹ

Գեղարքունիքի մարզի Ազատ գյուղի զորամասի ինժեներասակրավորային վաշտի կացարանում հրդեհի հետևանքով մահացած 15 զինծառայողների ծնողներն այսօր վաղ առավոտից բողոքի ակցիա են իրականացնում ՀՀ ՊՆ շենքի դիմաց, փակել են շենքի մուտքերը՝ պահանջելով հանդիպում վարչապետ Նիկոլ Փաշինյանի և պաշտպանության նախարար Սուրեն Պապիկյանի հետ։

«ԱԻՆ գնդապետն ասաց, որ զինվորներն իրենց մահճակալներին պառկած են եղել, դրանից 15 օր հետո դատախազը հայտարարեց, թե գնդապետը դեպքի վայրում չի եղել․ էս ի՞նչ խաղեր են տալիս․․․ Ուզում են կոծկեն այս դեպքը»,- լրագրողների հետ զրույցում նշեց զոհված զինվորներից Արտյոմ Գրիգորյանի պապը։

«Սա եղել է տեռոր՝ կա՛մ ադրբեջանցիներն են արել, կա՛մ արվել է մեր վարչապետի ու պաշտպանության նախարարի գլխավորությամբ:

Ես պահանջում եմ նախարարությունց, ոնց տարել են մեր երեխին, թող բերեն տան, եթե չէ, ուրեմն իրենք պետք է մոխրանան:
Կամ պաշտպանության նախարարն ինչու հրաժարական չի տալիս, ամոթի զգացում ունի՞, թե՞ չունի: Թող հրաժարական տա, 15 երեխեքը խաղաղ պայմաններում կացարանում վառվե՞ն: Ես երեկ պետք է քեֆ անեի, որ երեխես տուն էր գալու, իսկ հիմա ինքը չկա, ո՞վ է տալու դրա պատասխանը»:

Հիշեցնենք՝ հունվարի 19-ին՝ ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:

Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։

Հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։

Մանրամասները՝ տեսանյութում։