24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
ԱՄՆ Պետքարտուղարությունը՝ Բլինքեն-Ալիև հեռախոսազրույցի մասին
Քաղաքականություն
15.02.2023 | 12:12
ԱՄՆ Պետքարտուղարության խոսնակ Նեդ Փրայսը նախօրեի ճեպազրույցում անդրադարձել է Ադրբեջանում մարդու իրավունքների խնդիրներին ու ընդդիմադիր ակտվիստ Բահթիյար Հաջիևի ձերբակալմանը։ Հարցին՝ արդյո՞ք պետքարտուղար Բլինքենը երկու շաբաթ առաջ Ադրբեջանի նախագահ Ալիևի հետ հեռախոսազրույցում բարձրաձայնել է Հաջիևի հարցը։
«Երբ պետքարտուղարը խոսում է իր ադրբեջանցի գործընկերոջ հետ, նրանք քննարկում են հարցերի լայն շրջանակ։ Նրանք իհարկե, քննարկում են Լեռնային Ղարաբաղը, տարածաշրջանային հարցեր, սակայն նաև ավելի լայն խոսակցություն է ծավալվում մարդու իրավունքների շուրջ։ Ամրապնդելով մարդու իրավունքները ցանկացած երկրում, այդ թվում՝ Ադրբեջանում, իր հերթին ամրապնդում է երկկողմ հարաբերությունները»,-ասել է Փրայսը։
Խոսելով բանտարկված ու հացադուլի մեջ գտնվող Հաջիևի վատթարացող առողջական վիճակի մասին՝ պետդեպի խոսնակը նշել է, որ իշխանությունները պատասխանատվություն են կրում այդ ամենի համար։
«Երբ ինչ-որ մեկը բանտարկվում է, այս դեպքում՝ քաղաքական դրդապատճառներով, իշխանությունների պարտականությունն է բժշկական օգնություն ցուցաբերել, ապահովել այս անձի տարրական կարիքները, և ,իհարկե, ինչպես մենք ասացինք այլ համատեքստերում, ովքեր պահում են նրան, ի վերջո պատասխանատու են նրա բարօրության համար»,-նշել է Փրայսը։
Հավելենք, որ Հաջիևը 2022-ի դեկտեմբերի 9-ին ձերբակալվել է «խուլիգանության» և «դատարանի նկատմամբ արհամարհանքի» մեղադրանքով։ Նա կտրականապես հերքում է այս պնդումները, և հացադուլ է հայտարարել։
ԱՄՆ մի շարք սենատորներ օրերս պահանջել էին Ադրբեջանի իշխանություներից ազատ արձակել Հաջիևին ու բոլոր քաղբանտարկյալներին։ ԱՄՆ Պետքարտուղարությունը ևս մի քանի անգամ նման կոչերով է հանդես եկել։
Էմմա Չոբանյան
