16.05.2026 | 11:55
Առանց քննության կվերականգնվի «պռավից» զրկված քաղաքացիների վարորդական իրավունքները․ Փաշինյանի առաջարկը
Ադըյամանում, որտեղ աշխատում են հայ փրկարարները, բնակչության կեսն արմատներով հայեր են․ պատմում է Կարո Փայլանը․ ՏԵՍԱՆՅՈՒԹ
Հասարակություն
08.02.2023 | 17:37
Հզոր երկրաշարժերի հետևանքով զոհերի թիվը միայն Թուրքիայում գերազանցել է 8,500-ը։ Զոհերի թվում կան Թուրքիայում բնակվող ինչպես քրիստոնյա, այնպես էլ մահմեդական հայեր։ Թուրքիայի խորհրդարանի պատգամավոր Կարո Փայլանը Factor TV-ին փոխանցեց, որ 150-ից 200 հայ է բնակվում Մալաթիա նահանգում, սակայն մահմեդական հայերի շրջանում էլ մեծ կորուստներ կան։
«Ես հիմա Մալաթիայում եմ, այստեղ ազգականներ և ընկերներ ունեմ։ Դժբախտաբար, Մալաթիա նահանգում 3 զոհ ունենք։ Կա նաև ջրի, հացի, գազի և էլեկտրականության խնդիր»,- ասաց Փայլանը։
Նրա խոսքով՝ տարրական պայմաններ չկան, մարդիկ չեն կարողանում իրենց տուն վերադառնալ։ Հիվանդանոցներում շատ վիրավորներ կան, և շատերին այլ նահանգներ են տեղափոխում օդանավերով։ Կարո Փայլանը նշեց, որ երկրաշարժից տուժած հայեր կան նաև Ադըյաման նահանգում։
«Կարող եմ ասել, որ Ադըյամանի բնակչության կեսն արմատներով հայեր են։ Հիմա Հայաստանից եկող խումբը հենց այստեղ պետք է աշխատի, և նրանք պետք է օգնեն բոլոր ժողովուրդներին։ Հիմա ազգություն որոշելու ժամանակ չէ․ թուրք, քուրդ, հայ, ով էլ լինի՝ պետք է օգնել»,- ասաց Թուրքիայի խորհրդարանի պատգամավորը։
Ըստ Փայլանի՝ կան հայկական եկեղեցիներ և այլ կառույցներ, որոնք վնասներ են կրել երկրաշարժի պատճառով, սակայն ոչ այնքան մեծ, և հնարավոր է դրանք վերականգնել։
Անի Թամրազյան
