29.10.2026 | 21:30
Նորմալ է, համարժեք արձագանք է եղել․ Ռուստամ Բաքոյան. ՏԵՍԱՆՅՈՒԹ
Կոչ ենք անում Ադրբեջանին ձեռնարկել բոլոր միջոցները` Լաչինի միջանցքով անխոչընդոտ տեղաշարժը թույլ տալու համար․ Մեծ Բրիտանիայի դեսպանը՝ ԵԱՀԿ ՄԽ նիստում
Քաղաքականություն
17.01.2023 | 17:16
Հայաստանի կողմից հրավիրված ԵԱՀԿ Մշտական խորհրդի հատուկ նիստում, որը ղեկավարել է ՀՀ ԱԳ նախարար Արարատ Միրզոյանը, կազմակերպությունում Մեծ Բրիտանիայի դեսպան Նիլ Բուշը մտահոգություն է հայտնել Լաչինի միջանցքի փակման և դրա հետ կապված մարդասիրական հետևանքների առնչությամբ։
«Լաչինի միջանցքի շարունակվող խափանումները և դրա հետ կապված հումանիտար հետևանքները խորապես մտահոգիչ են։ Մենք ցավում ենք, որ չնայած հարցը բարձրացվել է այստեղ՝ ԵԱՀԿ-ում և ՄԱԿ-ի ԱԽ-ում, նշանակալի առաջընթաց չի գրանցվել։ Մենք կոչ ենք անում Ադրբեջանի կառավարությանը ձեռնարկել բոլոր միջոցները՝ հումանիտար ապրանքների և քաղաքացիական անձանց անխոչընդոտ տեղաշարժն ապահովելու համար։ Միացյալ Թագավորությունն ընդունում է, որ երկու կողմերն էլ մտահոգություններ ունեն 2020 թվականի հրադադարի շուրջ պայմանավորվածությունների կատարման հետ կապված։ Մենք կոչ ենք անում Հայաստանին և Ադրբեջանին ձեռնարկել բովանդակալից բանակցություններ՝ գտնելու կայուն և խաղաղ կարգավորում, որն ապահովում է խաղաղություն և կայունություն տարածաշրջանում»,- ասել է Բուշը։
Նա նշել է, որ Լոնդոնն առաջարկում է իր շարունակական, անսասան և անվերապահ աջակցությունը միջազգային մեխանիզմներին, այդ թվում՝ ԵԱՀԿ-ին, որոնք աշխատում են՝ աջակցելու Հայաստանի և Ադրբեջանի միջև խաղաղությանը, և որ միայն խաղաղ ճանապարհով և երկխոսությամբ կարելի է հասնել խաղաղության։
Էմմա Չոբանյան
