Թվերի փոխարեն՝ անուններ․ Երևանում այս տարի 18 փողոց է անվանակոչվել

Դեկտեմբերի 20-ի ավագանու արտահերթ նիստում որոշվել էր անվանափոխել երևանյան մի շարք փողոցներ։ Ըստ այդ որոշման՝ Արաբկիր վարչական շրջանի 7 փողոց և Նորք-Մարաշ վարչական շրջանի 2 փողոց կկոչվեն հայ անվանի մարդկանց անուններով։

Մայրաքաղաքի  ավագանու «Իմ քայլը» խմբակցության անդամ  Լևոն Զաքարյանի խոսքով՝ փողոցների անվանակոչությունը միտում ունի հանրահռչակելու տվյալ մարդուն, իսկ գործընթացն էլ բավական երկար է տևում:

«Անվանակոչման որոշումը կայացվում է քննարկումների արդյունքում, որից հետո համապատասխան հանձնաժողովը եզրակացություն է տալիս: Քաղաքապետի որոշմամբ՝ նախագիծը գալիս է ավագանու նիստ և ընդունվում է ավագանու կողմից քվեարկության արդյունքում, իսկ այդ բոլոր փուլերում նախագիծը պետք է հավանության արժանանա, որպեսզի իրականացվի»,- Factor.am-ի հետ զրույցում ասաց ավագանու անդամը:

Ավագանու վերջին որոշումներով Արաբկիրի 49-րդ փողոցն անվանակոչվել է ԽՍՀՄ ներքին ծառայության ոստիկանության գեներալ-մայոր, ՀԽՍՀ արվեստի վաստակավոր գործիչ, երգահան Ալեքսեյ Հեքիմյանի անունով՝ «Ալեքսեյ Հեքիմյան փողոց»։ 

Արաբկիրի 37-րդ փողոցը անվանակոչվել է դերասան, ռեժիսոր, ՀԽՍՀ ժողովրդական արտիստ Կարպ Խաչվանքյանի անվամբ, իսկ Արաբկիրի 39-րդ փողոցը՝ հետախույզ Գևորգ Վարդանյանի։ Արաբկիրի 17-րդ փողոցն այսուհետ կրում է հայ արձակագիր, ազատամարտիկ Լևոն Խեչոյանի անունը, իսկ Արաբկիրի 19-րդ փողոցը՝ անվանի բանաստեղծ, պետական մրցանակի դափնեկիր, ՀՀ մշակույթի վաստակավոր գործիչ Դավիթ Հովհաննեսի անունը։

Արաբկիրի 23-րդ փողոցը անվանակոչվել է բանաստեղծ, թարգմանիչ, գրականագետ, բանասիրական գիտությունների դոկտոր Հրաչյա Թամրազյանի անվամբ, իսկ  Արաբկիրի 25-րդ փողոցը՝ բանաստեղծ, թարգմանիչ Սլավիկ Չիլոյանի անվամբ: Նորք-Մարաշ վարչական շրջանի Նորքի 5-րդ փողոցն էլ կրում է մեծանուն դիրիժոր Օհան Դուրյանի անունը, որի անվամբ վերջերս արձան-հուշակոթող դրվեց Ազատության հրապարակում՝ Օպերայի հարակից տարածքում, իսկ Նորքի 17-րդ փողոցն անվանակոչվել է «Բուժաշխատողների փողոց»։

Այս տարվա ընթացքում Երևան քաղաքում փողոցների անվանակոչման մասին ևս երեք որոշում է ընդունվել։ Ապրիլի 25-ի նիստում ավագանին որոշել էր անվանակոչել երևանյան երեք փողոց, հունիսի 21-ին՝ հինգ, իսկ նոյեմբերի 24-ին՝ մեկ։ Ընդհանուր առմամբ, մեկ տարվա ընթացքում Երևան քաղաքում անվանակոչվել է տասնութ փողոց։ Ուշագրավ է, որ դրանցից միայն մեկն է կին գործչի անունով․  Արաբկիրի 51-րդ փողոցն անվանակոչվել էր դանիացի միսիոներ Մարիա Յակոբսենի պատվին, որն օգնել է ցեղասպանության հետևանքով որբացած երեխաներին։

Ըստ ավագանու անդամ Լևոն Զաքարյանի՝ անվանակոչված փողոցներում կարևոր է նաև ցուցատախտակների տեղադրումը:

«Մենք հիմա ուզում ենք Երևան քաղաքում մեկ ընդհանուր տեսքի նմուշ սահմանել և բոլոր փողոցների նոր անվանումները փակցնել, որովհետև այդ գործընթացը վաղուց չի արվել, և կան բազմաթիվ փողոցներ, որտեղ որևէ ցուցանակ առկա չէ, թե փողոցն ում անուն է կրում: Այդ ուղղությամբ հիմա աշխատում ենք, որպեսզի դա նույնպես արվի» – ընդգծում է  Զաքարյանը:

Զաքարյանի դիտարկմամբ բնակիչների կողմից նմանատիպ փոփոխությունները լավ են ընդունվում, և հաճախ հենց քաղաքացիներն ու հասարակական կազմակերպություններն են դիմում քաղաքապետարանին, որպեսզի անվանակոչություններ իրականացվեն:

Փողոցների անվանափոխումը անվանիներին ևս մեկ անգամ հարգանքի տուրք մատուցելու հնարավորություն է․ Factor․am-ի հետ զրույցում նշում է Երևանի ավագանու անդամ Իզաբելլա Աբգարյանը։

«Որոշումը նաև քննարկվել էր հանձնաժողովում, ստացել էր դրական արձագանք և ընդունվել արտահերթ նիստով։ Արդեն իսկ անվանակոչումները տեղի են  ունեցել»,-ասում է Աբգարյանը։

Աբգարյանի խոսքով՝ ավագանու անդամը նախ դիմում է կազմակերպական վարչություն, ստանում է այն փողոցների ցանկը, որոնք միայն համարակալված են։ Այս պարագայում  նման փողոցները շատ էին Արաբկիր վարչական շրջանում,  և հիմնականում հենց այդտեղ է տեղի ունեցել անվանակոչումը։

«Ես առհասարակ չեմ հրավիրվում նման քննարկումներին․ քաղաքապետն ավագանու նիստից երկու օր առաջ  քննարկում է ունեցել խմբակցությունների հետ, ու կրկին հրավիրված չեմ եղել»,- ասում  է ավագանու անդամը:

Իզաբելլա Աբգարյանի խոսքով՝ առաջիկայում պատրաստվում է երևանյան փողոցներից մեկը ճարտարապետ Աննա Տեր-Ավետիքյանի անունով կոչելու նախագիծ  առաջարկել։  

Անի Թամրազյան