26.08.2026 | 11:49
ԿՀՎ տնօրենը Մոսկվա էր ժամանել «հատուկ ծառայությունների միջև շփումների» համար. Պեսկով
Հունվարի 7-ից մի շարք դատավորների նոր գործեր չեն մակագրվի
Հասարակություն
29.12.2022 | 13:00
2023 թվականի հունվարի 7-ից Երևանի ընդհանուր իրավասության դատարանի «Աջափնյակ 1» նստավայրի ու մարզերի քրեական մասնագիտացմամբ առանձին դատավորները, որոնք քննում են մինչդատական քրեական վարույթի դատական երաշխիքների վարույթներ և օպերատիվ-հետախուզական միջոցառումներ իրականացնելու մասին միջնորդություններ, այլևս նոր գործեր չեն ստանա։
Բարձրագույն դատական խորհուրդը հայտարարարություն է տարածել՝ նշելով, որ «Դատական օրենսգրքում» փոփոխություններ և լրացումներ կատարելու մասին» սահմանադրական օրենքը, որը կարգավորում է վերը նշված իրավահարաբերությունները, ուժի մեջ է մտնում հունվարի 7-ից։
Հիշեցնենք, որ դեկտեմբերի 23-ին Ազգային ժողովն ընդունել է «Դատական օրենսգրքում» փոփոխություններ և լրացումներ կատարելու մասին» սահմանադրական օրենքը, համաձայն որի՝ քրեական գործեր քննող դատավորները կքննեն նաև մինչդատական քրեական վարույթի դատական երաշխիքների վարույթներ և օպերատիվ-հետախուզական միջոցառումներ իրականացնելու մասին միջնորդություններ, իսկ այդ միջնորդություններն այժմ քննող առանձին դատավորները կդառնան ռեզերվային։
ԲԴԽ-ն հայտնում է նաև, որ օրենքի ուժի մեջ մտնելուց հետո տասնօրյա ժամկետում առանձին դատավորների վարույթում եղած գործերը չավարտելու դեպքում դրանք ենթակա են վերաբաշխման՝ մեկշաբաթյա ժամկետում, որից հետո համապատասխան դատավորները ձեռք են բերում ռեզերվային դատավորի կարգավիճակ: Սա նշանակում է, որ եթե քրեական մասնագիտացմամբ առանձին դատավորները չհասցնեն ավարտել իրենք վարույթում եղած կիսատ գործերը, ապա դրանք կփոխանցվեց քրեական գործեր քննող դատավորներին։
«Հաշվի առնելով այն հանգամանքը, որ առաջիկայում Երևան քաղաքի և մարզերի առաջին ատյանի ընդհանուր իրավասության դատարանում առաջանալու է քրեական մասնագիտացման դատավորի թափուր հաստիքներ՝ հետևաբար, համապատասխան մասնագիտացում ունեցող առաջին ատյանի դատարանների դատավորները կարող են «Հայաստանի Հանրապետության դատական օրենսգիրք» սահմանադրական օրենքով սահմանված կարգով տեղափոխման դիմում ներկայացնել նշված թափուր հաստիքներում նշանակվելու համար իրենց թեկնածությունը քննարկելու նպատակով: Միաժամանակ, տեղեկացվում է, որ դիմումները կարող են ներկայացվել մինչև 2022 թվականի դեկտեմբերի 30-ը՝ ժամը 18:00-ն»,- հայտնում են ԲԴԽ-ից։
Արաքս Մամուլյան
