Շվեյցարիա չդառնալու, ռազմավարություն չունենալու և հայկական «մենթալիտետի» մասին. ապաքաղաքական զրույց Մարիամ Մարգարյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է քաղաքական գիտությունների դոկտոր, պրոֆեսոր Մարիամ Մարգարյանը: Նրա կարծիքով՝ այժմ հետխորհրդային երկրների վերաբերյալ ավելի հազվադեպ է կիրառվում «անցումային» եզրը, և պատճառն այն է, որ 1990-ականների կեսերին «ժողովրդավարական անցում» իրականացնող պետություններում առաջացել է որոշակի ճգնաժամ: Դրա պատճառներից մեկն այն էր, որ հասարակությունները սխալ էին կողմնորոշված. քաղաքացիները պատրանք ունեին, որ մի քանի տարուց ապրելու են այնպես, ինչպես ապրում են Լոնդոնում կամ Փարիզում: Էմոցիոնալ սպասումներն ավելի զորեղ էին, քան ինստիտուցիոնալ պատկերացումները:

Ըստ Մարիամ Մարգարյանի՝ գծային ազատականացման պատճառով 1990-ականներին բնակչության չնչին մասն արագ հարստացավ, իսկ մեծամասնությունը նույնքան արագ աղքատացավ՝ կորցնելով սոցիալական դիրքը, հարգանքը և, ի վերջո, ինքնությունը: Այդ մարգինալացված զանգվածը վերափոխելու համար քաղաքական վերնախավը պետք է ունենա ռազմավարություն, որի առանցքում կլինեն ազգային արժեքները:

Քաղաքագետը համաձայն չէ, որ «ազգային մենթալիտետը» (մտահայեցողությունը) կեղծ գիտական կատեգորիա է: «Մենթալիտետ» հասկացությունն ընդունված է ոչ միայն քաղաքագիտության, այլև հոգեբանության, մարդաբանության մեջ, և սովորաբար բնորոշում է ազգի առանցքային հատկանիշները «անցյալ-ներկա-ապագա» եռաչափ հարացույցի մեջ: Իհարկե, այդ հատկանիշները հայտնվում են որոշակի քաղաքակրթական միջավայրում: Հաղորդման հյուրը բերում է Երկրորդ համաշխարհային պատերազմում պարտված Գերմանիայի օրինակը, երբ բարձրագույն մակարդակով որոշվել էր, որ ճգնաժամից դուրս գալու անհրաժեշտ բաղադրիչներից է քաղաքացիական կրթությունը:

Մանրամասները՝ տեսանյութում:

Արամ Աբրահամյան