Քաղաքականություն
20.11.2024 | 20:18
Ռուսաստանի նախագահ Վլադիմիր Պուտինը վերջին անգամ հանրության առաջ հայտնվել է գրեթե երկու շաբաթ առաջ։ Դրանից հետո Կրեմլը սկսել է երկրի ղեկավարի աշխատանքի տեսանելիության համար նրա հանդիպումների մասին «պահածոյացված» զեկույցներ հրապարակել, որոնք իրականում կայացել են մի քանի շաբաթ, անգամ մի քանի ամիս առաջ։ Այս ամենին ուշադրություն է դարձրել Faridaily Telegram-ալիքը։
Այսպես, Կրեմլը հայտնել է, որ նոյեմբերի 12-ին Պուտինը հանդիպել է Պետդումայի «Եդինայա Ռոսիա» խմբակցության ղեկավար Վլադիմիր Վասիլևի հետ։ Հանդիպմանը Պուտինը Վասիլևին ասել է, որ իր կուսակցությունն «ակտիվորեն մասնակցում է» բյուջեի պատրաստմանը, թեև այն Պետդումա է ներկայացվել սեպտեմբերի 30-ին և առաջին ընթերցմամբ հաստատվել հոկտեմբերի 24-ին։
Պուտինը խոսել է «Նոր մարդիկ» խմբակցության ղեկավար Ալեքսեյ Նեչաևի հետ բյուջեի վրա աշխատելու և առաջին ընթերցմամբ այն ընդունելու մասին։ Կրեմլի տվյալներով՝ հանդիպումը տեղի է ունեցել նոյեմբերի 19-ին, սակայն բյուջեն արդեն երկրորդ ընթերցմամբ ընդունվել էր նոյեմբերի 14-ին։
Նման պատմություն է տեղի ունեցել Լիբերալ-դեմոկրատական խմբակցության ղեկավար Լեոնիդ Սլուցկիի հետ. նա Պետդումայում ելույթ է ունեցել այն օրը, երբ, ըստ Կրեմլի, կայացել է նրա հանդիպումը Պուտինի հետ։ Ավելին, ըստ պաշտոնական հաղորդագրության, Սլուցկին Պուտինի հետ խոսել է խորհրդարանի ստորին պալատում ունեցած ելույթի հետ գրեթե միաժամանակ։
Ըստ Faridaily-ի աղբյուրների՝ Կրեմլի կայքում Պուտինի հանդիպումներից «պահածոյացված» նյութերի հրապարակման հետաձգումն արդեն երկու ամսվա է հասել։ Ընդ որում, Պուտինն ինքը վերջին անգամ հանրության առաջ հայտնվել է նոյեմբերի 7-ին «Վալդայ» ֆորումում։
ՌԴ նախագահի անհետացումը հանրային դաշտից տեղի է ունեցել Ուկրաինայի շուրջ էսկալացիայի ֆոնին։ ԱՄՆ նախագահ Ջո Բայդենը Կիևին թույլատրել է հեռահար հարվածներ հասցնել Ռուսաստանի տարածքին ամերիկյան ATACMS հրթիռներով։ Դրանից հետո ԵՄ որոշ երկրներ թույլատրել են Կիևին օգտագործել իրենց զենքերը ռուսական տարածքի խորքերին հարվածելու համար։
Թարգմանությունը՝ Տաթև Ֆռանգյանի
