13.04.2026 | 20:22
Մրցաշրջանի ամենագեղեցիկ գոլերից մեկը՝ ռաբոնա հարվածով․ ՏԵՍԱՆՅՈՒԹ
Ազգի խայտառակությունն է՝ բոյկոտող ընդդիմությունը գնաց ԱԺ՝ Զատուլին պաշտպանելու․ ինչո՞ւ Ալիևին չդատապարտեցիք ամբիոնից սեպտեմբերի 13-ին․ Ստեփան Գրիգորյան․ ՏԵՍԱՆՅՈՒԹ
Քաղաքականություն
28.10.2022 | 21:47
Հոկտեմբերի 31-ին Սոչիում նախատեսված Փաշինյանի և Ալիևի հետ հանդիպումից օրեր առաջ ՌԴ նախագահ Վլադիմիր Պուտինը «Վալդայ» ակումբում հայտարարում է․ «Եթե հայ ժողովուրդը և ՀՀ ներկա ղեկավարությունը համարում են, որ պետք է ընտրել խաղաղության պայմանագրի տարբերակներից մեկը, որքան ես գիտեմ՝ «վաշինգտոնյանը» ենթադրում է Ադրբեջանի ինքնիշխանություն ամբողջ Ղարաբաղի վրա: Դե, եթե Հայաստանն այդպես է համարում, խնդրեմ: Մենք կսատարենք հայ ժողովրդի ցանկացած որոշում»:
Խնդիրն այն է, որ նույն Պուտինը պատերազմից հետո երկու անգամ հայտարարել է՝ «Լեռնային Ղարաբաղն Ադրբեջանի տարածք է՝ ըստ միջազգային նորմերի»։ Ո՞ր Պուտինին հավատանք՝ Factor TV-ի հարցազրույցում հետաքրքրվեցինք քաղաքագետ Ստեփան Գրիգորյանից։
«Պուտինը շատ լավ գիտի, որ հայ ժողովուրդը դժգոհ է ՌԴ-ի և ՀԱՊԿ-ի քաղաքականությունից։ Հայ ժողովուրդը գիտի, որ Ադրբեջանի հետ միասին ՌԴ-ն մեր դեմ քաղաքականություն է իրականացնում։ Հիմա փորձ է անում Հայաստանի հասարակությանը մանիպուլացնել, թե ինչո՞ւ եք քննարկում Վաշինգտոնի տարբերակը։ Լսել եմ, որ ԱՄՆ-ն առաջարկում է Բաքու-Ստեփանակերտ խոսակցություն սկսել՝ միջազգային մեխանիզմներով, բայց ես չեմ էլ լսել վաշինգտոնյան տարբերակի մասին»,- ասաց նա։
Քաղաքագետը պնդում է, որ Պուտինը հակասում է ինքն իրեն․ «Հիշո՞ւմ եք՝ նոյեմբերի 9-ից հետո Պուտինը երկու անգամ հայտարարեց, որ ոչ միայն 7 շրջաններն են պատկանում Ադրբեջանին, այլև Լեռնային Ղարաբաղը Ադրբեջանի տարածք է՝ ըստ միջազգային նորմերի, նրա անբաժանելի մասն է։ Ինքը դա ասել է և հակասում է իր այսօրվա ասածին։ Հենց ՌԴ-ն է ուզում հանձնել Լեռնային Ղարաբաղը Ադրբեջանին, այլ ոչ թե ԱՄՆ-ն»։
Հարցազրույցն ամբողջությամբ՝ տեսանյութում։
Ռոբերտ Անանյան
