31.05.2026 | 20:00
չԾխելու ՇԵՐՏԵՐԸ. ինչպես է շրջանցվում արդեն 6 տարի գործող օրենքը․ ՏԵՍԱՆՅՈւԹ
«Կոչ ենք անում Ադրբեջանին զերծ մնալ Հայաստանի տարածքային ամբողջականության դեմ ագրեսիայի հետագա գործողություններից»․ ԵԽԽՎ պատգամավորների հայտարարությունը
Քաղաքականություն
18.10.2022 | 22:43
ԵԽԽՎ 47 պատգամավորներ հանդես են եկել գրավոր հայտարարությամբ, որով դատապարտում են ադրբեջանական ագրեսիան ՀՀ ինքնիշխան տարածքի դեմ և Ադրբեջանին կոչ անում անհապաղ դուրս բերել զորքերը ՀՀ ինքնիշխան տարածքից և ազատ արձակել բոլոր ռազմագերիներին։
Հայտարարության մեջ ասվում է․
«Մենք՝ ներքոստորագրյալներս, հայտարարում ենք հետևյալը՝
Ադրբեջանը լայնածավալ ռազմական ագրեսիա է ձեռնարկել Հայաստանի Հանրապետության ինքնիշխան տարածքի դեմ 2022թ. սեպտեմբերին։
Ռազմական ագրեսիայի այս գործողություններով Ադրբեջանը թիրախավորել է նաև քաղաքացիական ենթակառուցվածքները, Հայաստանի բնակավայրերը՝ պատճառելով հարյուրավոր մարդկային կորուստներ, այդ թվում՝ խաղաղ բնակիչների։ Կան խոշտանգումների, գերի ընկած և մահացած զինվորների, այդ թվում՝ կանանց խեղման սարսափելի դեպքերի ապացույցներ։
Մենք խստագույնս դատապարտում ենք Ադրբեջանի ագրեսիան, որը բացահայտ խախտում է ՄԱԿ-ի կանոնադրությունը, Հելսինկյան եզրափակիչ ակտը, միջազգային մարդասիրական իրավունքը և Եվրոպայի խորհրդի առջև Ադրբեջանի ստանձնած կանոնադրական, պայմանական պարտավորությունները։
Մենք նաև դատապարտում ենք ռազմագերիների և գերեվարված հայերի նկատմամբ դիտավորյալ սպանությունները, խոշտանգումները և անմարդկային վերաբերմունքը Ադրբեջանի զինված ուժերի կողմից, որոնց տեսանյութերը հրապարակվել են սոցցանցերում։
Կոչ ենք անում Ադրբեջանին զերծ մնալ Հայաստանի տարածքային ամբողջականության դեմ ագրեսիայի հետագա գործողություններից
և խաղաղ կերպով ներգրավվել բանակցային գործընթացում։
Մենք պահանջում ենք ադրբեջանական զինուժի անհապաղ և անվերապահ դուրսբերում Հայաստանի ինքնիշխան տարածքից և բոլոր ռազմագերիների և այլ գերիների շուտափույթ հայրենադարձում»։
