30.04.2026 | 09:17
ՀՀ-ն Թրամփի «Խաղաղության խորհրդի» կանոնադրությունը վավերացնելու գործընթաց է սկսել
Ամուլսարի ընդերքօգտագործման իրավունքը և շինարարության ժամկետը երկարացվել է՝ առանց նոր փորձաքննության
Տնտեսություն
17.10.2022 | 19:00
«Լիդիան Արմենիան» և Տարածքային կառավարման և ենթակառուցվածքների նախարարությունը՝ նախարար Գնել Սանոսյանի գլխավորությամբ, երկարացրել են «Լիդիան Արմենիա» ՓԲԸ-ի ընդերքօգտագործման իրավունքը և շինարարության ժամկետը Ամուլսարի հանքավայրի համար՝ առանց շրջակա միջավայրի վրա ազդեցության նոր փորձաքննության։ Այս մասին Factor.am-ը տեղեկանում է նախարարության կայքում հրապարակված պայմանագրից։
Այսպիսով՝ նոր փոփոխությամբ Ամուլսարի ոսկեբեր քվարցիտների հանքավայրը ժամանակավոր տիրապետման և օգտագործման նոր ժամկետ է սահմանվել մինչև 2039 թվականի մարտի 25-ը՝ նախկին 2036թ. հունվարի 1-ի փոխարեն:
Շինարարական շրջան սահմանված 2021թ. հունիսի մեկը երկարացվել է մինչև 2024թ. օգոստոսի 26-ը: Պայմանագիրը երկարաձգվել է սեպտեմբերի 19-ին։
Հիշեցնենք, որ «Ընդերքի մասին» օրենքում փոփոխություններ կատարելու մասին նախագիծն ընդունվեց այս տարվա հունիսին։ Նոր օրենքում սահմանվեց ընդերքօգտագործման իրավունքի ժամկետի երկարաձգում անհաղթահարելի ուժի հիմքով: Ի թիվս մի շարք պատճառների՝ հրդեհների, ջրհեղեղների, երկրաշարժների, փոթորիկների կամ այլ բնական աղետների, ինչպես նաև պայթյունների, պատերազմի, ահաբեկչության, քաղաքացիական պատերազմի, այս նախագծի ընդունումից հետո անհաղթահարելի ուժ է համարվում նաև քաղաքացիական անհնազանդությունը՝ բողոքի ակցիաների տարբեր դրսևորումները, որոնց արդյունքում հնարավոր չի եղել հանքավայրում կազմակերպել ընդերքօգտագործման աշխատանքները: Նախագծի համաձայն՝ ընդերքօգտագործման գործող իրավունքի ժամկետները երկարաձգվելու են առավելագույնն այդ հանգամանքների գործողության ժամկետով՝ առանց նոր փորձաքննության անցկացման։
Օրենքում փոփոխություններ կատարելու այս նախագիծը բնապահպանների և քաղհասարակության շրջանում լայն դժգոհությունների առիթ էր դարձել։ Քաղհասարակության ներկայացուցիչները նշում էին, որ Ընդերքի մասին օրենսգրքում լրացումներ կատարելու միակ նպատակը Ամուլսարի շահագործման համար պայմաններ ստեղծելն է։
Իրապես ստացվում է, որ «Լիդիան Արմենիա» ՓԲԸ-ն առաջիններից է, որ «օգտվեց» «Ընդերքի մասին օրենսգրքում փոփոխություններ և լրացումներ կատարելու մասին» ՀՀ օրենքից։
Անժելա Պողոսյան
