Ուկրաինական բանակը մեկ շաբաթվա ընթացքում երկրորդ խոշոր բեկումն է կատարել Խերսոնի շրջանում

Ուկրաինացի զինվորականներն ազատագրել են Խերսոնի շրջանի Դավիդով Բրոդ գյուղը։ Այստեղ երկար ամիսներ եղել է տարածաշրջանում ռուսական ուժերի հիմնական ամրացված տարածքը, գրում է Meduza-ն։

«Կարևոր բնակավայրի համար կատաղի մարտերը շարունակվել են երկու ամիս, բայց ռուսական բանակը նահանջել է՝ խուսափելով առաջացող շրջափակումից»,- հայտարարել է Իգոր Ստրելկովը։

Ռուսական ուժերը նաև լքել են մոտակայքում գտնվող մեծ գյուղերը։ Ուկրաինական բանակը, ըստ WarGonzo նախագծի հիմնադիր Սեմյոն Պեգովի, «մեծ բեկում կատարեց» և «լիակատար վերահսկողություն հաստատեց» Ինգուլեց գետի ձախ ափին գտնվող ճանապարհի վրա:

Հոկտեմբերի 4-ի ցերեկը Ուկրաինայի Զինված ուժերի 35-րդ առանձին ծովային բրիգադի զինծառայողները տեսանյութ են նկարահանել, որտեղ նշում են, որ Դավիդով Բրոդ գյուղում տեղադրել են Ուկրաինայի դրոշը։

Ուկրաինայի ցամաքային զորքերի «Հարավ» օպերատիվ հրամանատարությունը պնդում է, որ բացի Դավիդով Բրոդից՝ ազատագրվել են ևս յոթ բնակավայրեր՝ Լյուբիմովկան, Բելյաևկան, Ուկրաինկան, Բոլշայա և Մալայա Ալեքսանդրովկան, Կրեշչենովկան և Զոլոտայա Բալկան։ Վերջին երկու բնակավայրերի ազատագրման մասին հաղորդվել է հոկտեմբերի սկզբին։

Ուկրաինայի նախագահ Վլադիմիր Զելենսկին հայտարարել է, որ դա «հեռու է ամբողջական ցուցակից»։ Նրա խոսքով՝ միայն այս շաբաթ տասնյակ բնակավայրեր են ազատագրվել Խարկովի, Լուգանսկի և Դոնեցկի մարզերում։ Ուկրաինայի բանակը, նշել է նախագահը, շարունակում է «արագ և հզոր» առաջխաղացումը երկրի հարավում։

Տաթև Ֆռանգյան