Աննա Վարդապետյանին առաջադրելու ենք գլխավոր դատախազի պաշտոնում. Կոնջորյան․ ՏԵՍԱՆՅՈՒԹ

«Քաղաքացիական պայմանագիր» խմբակցության ղեկավար Հայկ Կոնջորյանը Ազգային ժողովում պատասխանելով լրագրողների հարցին, հաստատեց մամուլում շրջանառվող տեղեկությունն այն մասին, որ ՔՊ-ն Աննա Վարդապետյանին է առաջադրելու գլխավոր դատախազի պաշտոնում։

Տիկին Վարդապետյանը թե՛ իր մասնագիատական որակներով, թե՛ իր բարձր բարոյական ու արժեքային հատկանիշներով, նաև օրենսդրությամբ սահմանված պահանջներով համապատասխանում է այն կարևորագույն առաքելությանը, որը մեր կարծիքով պետք է ունենա ապագա ՀՀ գլխավոր դատախազը»,- նշեց Կոնջորյանը:

Հարցին՝ Աննա Վարդապետյանը վարչապետի օգնականն է, և նրան կարելի է նաև թիմի անդամ համարել, արդյո՞ք նրա անաչառության հարցը դրանով չի դրվում կասկածի տակ, Կոնջորյանը պատասխանեց. «Աննա Վարդապետյանը կուսակցական չէ: Ես վստահ եմ, որ տիկին Վարդապետյնն ընտրվելուց հետո միանշանակ կատարելու է ՀՀ Սահմանադրությամբ և օրենքներով իրեն լիազորված գործողությունները և լինելու է Սահմանադրության, օրենսդրության և իր խղճի առջև մաքուր ու պատասխանատու»:

Անդրադառնալով դիտարկմանը, որ Աննա Վարդապետյանի անունը կապվեց սկանդալի հետ, ըստ որի նա Ռուբեն Հայրապետյանի և նրա որդուն վերաբերող գործն էր խմբագրել, Հայկ Կոնջորյանն արձագանքեց, որ Վարդապետյանը գործել է իր պարտականությունների և լիազորությունների շրջանակում:

«Բոլոր պետական պաշտոնյաները պարտավոր են կատարել այնպիսի գործողություններ, որոնց համար լիազորված են օրենքներով և Սահմանադրությամբ: Եթե այս կամ այն պաշտոնյան, անկախ իր կարգավիճակից, կատարում է մի գործողություն, որն իրավական պետությունում կարող է դիտարկվել հիմնավոր և ապացուցվել, որ չի համապատասխանում վերոնշյալ չափանիշներին, ապա մենք իրավական պետություն ենք և այդ հարցով պետք է իրավական որոշում կայացվի:

Ես գիտեմ, որ ձեր մատնանշած օրինակով դա բացարձակապես չի համապատասխանում այն համատեքստին, որը փորձ էր արվում այդ սկանդալի մեջ ներկայացնել: Ես գիտեմ, որ բազմաթիվ պաշտոնյաներ, իրենց պաշտոնի բերումով, երբեմն իրենց գործողությունների արդյունքում կարող են դառնալ այս կամ այն խմբի, մեդիա շրջանակների թիրախի կենտրոնում, և կարծում եմ՝  ձեր մատնաշած դեպքը ևս եղել է թիրախավորման արդյունք և, բնականաբար, այդ թիրախավորումը որևէ կապ չունի իրականության և այն մեղադրանքների հետ, որոնք հնչեցվում են»,- նշեց Կոնջորյանը:

Մանրամասները՝ տեսանյութում: