05.11.2026 | 18:25
Վիլեն Գաբրիելյանը մանրամասներ է հայտնում ուժայինների հետ փակ հանդիպումից․ ՏԵՍԱՆՅՈՒԹ
2-րդ դասարանի աշակերտուհուն ծեծելու դեպքով ուսուցչուհուն ձերբակալելու որոշում է կայացվել
Հասարակություն
07.10.2026 | 16:00
Վարդաձորի միջնակարգ դպրոցի ուսուցչուհու նկատմամբ հանրային քրեական հետապնդում է հարուցվել աշակերտուհու նկատմամբ բռնություն կիրառելու դեպքի առթիվ։ Քննչական կոմիտեի հաղորդմամբ՝ ուսուցչուհին դասի ժամանակ ցուցափայտով հարվածել է աշակերտուհուն, ապա միջանցքում ձեռքով հարվածելով՝ քաշելով տարել դասասենյակ։ Ուսուցչուհու նկատմամբ կայացվել է ձերբակալման որոշում։
ՔԿ-ի հաղորդագրությունը՝ ստորև․
«2026 թվականի հոկտեմբերի 6-ին ՀՀ քննչական կոմիտեում ստացված առերևույթ հանցանքի վերաբերյալ հաղորդման համաձայն՝ սեպտեմբերի 30-ին Վարդաձորի միջնակարգ դպրոցի ուսուցչուհին դասի ժամանակ խոսելու համար ցուցափայտով հարվածել է աշակերտուհուն, որից հետո, երբ երեխան փախել է միջանցք, ուսուցչուհին դուրս է եկել և ձեռքով հարվածելով անչափահասին՝ քաշելով տարել է դասասենյակ։
Դեպքի առթիվ ՀՀ քննչական կոմիտեի Գեղարքունիքի մարզային քննչական վարչությունում նախաձեռնվել է քրեական վարույթ՝ անչափահասի նկատմամբ ֆիզիկական ուժեղ ցավ կամ հոգեկան ուժեղ տառապանք պատճառելու հոդվածի հատկանիշներով։
Նախաքննության ընթացքում ձեռք բերված բավարար ապացույցների հիման վրա՝ քննիչի կողմից ուսուցչուհու նկատմամբ հանրային քրեական հետապնդում հարուցելու վերաբերյալ միջնորդություն է ներկայացվել հսկող դատախազին, որը բավարարվել է:
Նրա նկատմամբ կայացվել է ձերբակալման որոշում:
Նախաքննությունը շարունակվում է»։
Դեպքի մասին Factor TV-ն հայտնել էր հոկտեմբերի 6-ին։ Գեղարքունիքի մարզի գյուղերից մեկում 2-րդ դասարանի աշակերտուհու նկատմամբ ուսուցչուհու կողմից բռնություն կիրառելու մասին Factor TV-ին պատմել էր երեխայի մորաքույրը։ Նրա խոսքով՝ ուսուցչուհին երեխային հարվածել էր դասասենյակում, ինչից հետո երեխան վախից դուրս էր վազել, սակայն ուսուցչուհին նրան կրկին տարել էր դասասենյակ։ Մորաքույրը նաև հայտնել էր, որ դեպքից հետո երեխայի պարանոցն ու ձեռքերը ուռած են եղել։ Factor TV-ի հրապարակումից հետո ՔԿ-ն հայտնել էր, որ դեպքի առնչությամբ նախաձեռնվել է քրեական վարույթ։
