20.11.2024 | 15:24
Թուրքիայի խորհրդարանում ՆԳ նախարարի մասնակցությամբ ծեծկռտուք է տեղի ունեցել․ ՏԵՍԱՆՅՈՒԹ
Բաքվում կրկին հայտարարում են՝ Հայաստանի հետ խաղաղության բանակցությունները պետք է հիմնվեն «միայն Բաքվի 5 առաջարկների վրա»
Քաղաքականություն
10.05.2022 | 12:48
Բաքվից կրկին հայտարարում են, որ Հայաստանի հետ հնարավոր խաղաղության պայմանագրի մասին բանակցությունները պետք է վարվեն բացարձակապես ադրբեջանական 5 սկզբունքների հիման վրա։ Տեղական լրատվամիջոցների փոխանցմամբ՝ նման հայտարարություն է արել երկրի ԱԳ փոխնախարար Խալաֆ Խալաֆովը։
«Բրյուսելյան հանդիպումից հետո և այս հանդիպմանը նախորդած գործընթացների արդյունքում կա վստահություն, որ հայկական կողմը համաձայնել է խաղաղության համաձայնագրի գործընթացին, ինչպես նաև դելիմիտացիային։ Բանակցային գործընթացը պետք է տեղի ունենա մեր կողմից Հայաստանին առաջարկված 5 կետերի հիման վրա»,- ասել է Խալաֆովը։
Հավելենք, որ օրերս ՀՀ Անվտանգության խորհրդի քարտուղար Արմեն Գրիգորյանի այն հայտարարությունը, թե հայկական կողմն իր 6 կետանոց առաջարկն է ներկայացրել, բավական անհանգստությամբ է ընդունվել Բաքվում։
«Մեր քննարկումներում, որ այդ երկու փաթեթը պետք է միացնել և բանակցություններ սկսել, ըմբռնում կա: Այդ ըմբռնումը կա ադրբեջանական կողմում, այդ ըմբռնումը կա մնացած մեր բոլոր միջազգային գործընկերների մոտ: Այսինքն՝ «5+6» կետերի շուրջ խաղաղության բանակցություններ սկսելը լեգիտիմ մոտեցում է, և մենք տեսել ենք փոխըմբռնում»,- ասել էր Գրիգորյանը:
Ադրբեջանի իշխանությունների խոսափող լրատվամիջոցները Գրիգորյանի խոսքերից հետո սկսեցին սեփական հանրությանը հանգստացնել, որ, իբր, Բաքուն հայկական առաջարկները չի քննարկում ու դժգոհություն հայտնել, որ ՀՀ ԱԽ քարտուղարը բացահայտել է Ադրբեջանի նախագահ օգնական Հիքմեթ Հաջիևի հետ Բրյուսելում կայացած հանդիպման մանրամասները։
Ի դեպ, ադրբեջանցի լրագրողներն այսօր հնարավորություն են ունեցել Հաջիևին անձամբ հարցնելու հայկական առաջարկների մասին, սակայն, ըստ մամուլում առկա հրապարակումների, նման հարց նրան չի ուղղվել։
Ադրբեջանի ԱԳ փոխնախարար Խալաֆովը խոսել է նաև անկալվների մասին ու հաստատել ՀՀ-ի կողմից ավելի վաղ արված հայտարարությունները, որ հիմա նման հարց չի քննարկվում՝ նշելով, որ դա դիտարկվելու է դելիմիտացիայի գործընթացում։
«Այդ տարածքների՝ Ադրբեջանի վերահսկողության տակ անցնելը դելիմիտացիայի գործընթաց է պահանջում, դրա համար էլ դիտարկվելու է այդ շրջանակներում։ Այդ հարցերը լուծվելու են քննարկումների արդյունքում»,- ասել է Խալաֆովը՝ չխոսելով, սակայն, Ադրբեջանում գտնվող հայկական տարածքներից։
Էմմա Չոբանյան
